Ўзбекистонда илк марта органик пахта етиштирилди

Ўзбекистонда “TEXTILE TECHNOLOGIES GROUP” МЧЖ ХК Чиноз кластери томонидан органик пахта етиштирилди. Ушбу органик пахтани эндиликда жаҳон ва Европа бозорига экспорт қилиш имкони туғилди. Бу ҳақда ЎзА хабар бермоқда.

Болгариядан ташриф буюрган “CONTROL UNION” ташкилоти инспектор-аудитори Екатерина Томева маҳсулотнинг сифат даражасини кўздан кечирди. Инспектор-аудитор ушбу пахтага юқори баҳо берди ва маҳсулотдан нафақат олий навли тола, балки чигитидан экологик тоза пахта ёғи олиниши мумкинлигини ҳам алоҳида қайд этди.

Шунингдек, Екатерина хоним Ўзбекистонда етиштирилган ушбу ноёб органик пахта маҳсулоти жаҳон ва Европа бозорига чиқиши учун сертификатга лойиқ эканлигини айтиб ўтди. У ушбу пахта бозорда рақобатбардош бўла олишига, сифат даражаси бўйича бозордаги нархи бир ярим баробар қўшимча қийматга эга бўлишига ишончи комил эканлигини таъкидлади.