Қандай объектлар “1 сўм” харид қийматида аукционга чиқарилади?

Вазирлар Маҳкамасининг 2025 йил 3 сентябрдаги “Eр участкаларини онлайн-аукцион орқали реализация қилиш ва кадастр соҳасида давлат хизматлари кўрсатиш тартиб-таомилларини такомиллаштириш юзасидан қўшимча чора-тадбирлар тўғрисида”ги қарори қабул қилинган.

Ушбу қарор билан электрон аукционлар орқали ер участкаларини сотиш ва кадастр соҳасида давлат хизматлари кўрсатиш тартиб-таомилларини такомиллаштириш юзасидан қўшимча чора-тадбирлар белгиланган. Унга кўра, кичик саноат зоналари ҳамда ёшлар саноат ва тадбиркорлик зоналаридаги ер участкаларини электрон онлайн-аукцион савдоларга чиқаришда ушбу саноат ва тадбиркорлик зоналари дирекциялари буюртмачи ҳисобланади.

Олис ва чўл ҳудудларда ташкил этиладиган ёшлар саноат ва тадбиркорлик зоналаридаги ер участкалари 2025 йил 5 сентябрдан “1 сўм” харид қийматида аукционга чиқарилиши белгиланган. Шунингдек, Солиқ қўмитасининг ҚҚС тўловчи юридик шахслар тўғрисидаги маълумотларни ўз ичига олган электрон ахборот тизими “E-аукцион” электрон онлайн-аукцион савдо платформасига интеграция қилинади. Кўп квартирали тураржойлар қуриш учун ер участкалари бўйича аукцион ғолиблари ажратилган ерда қурилиш ишларини бошлаб уни фойдаланишга топширгунга қадар бўлган жараёнларни “Онлайн маҳалла” электрон платформасида мониторинг қилиб бориш тизими яратилади. Шу билан бирга, “E-аукцион” электрон онлайн-аукцион савдо платформаси ва Кадастр агентлигининг “УЗКАД” кадастр ва кўчмас мулкни рўйхатдан ўтказиш интеграцион ахборот тизими билан интеграция қилинади ва бу аукционда реализация қилинган ер участкалари тўғрисидаги маълумотларни электрон платформада реал вақт режимида маҳаллалар кесимида кузатиш имконини беради.

Қаҳрамон ЭШОНҚУЛОВ, 

“Электрон онлайн-аукционларни ташкил этиш” АЖ вилоят ҳудудий вакили.