Россия Федерацияси фонд бозори сўнгги 8 йил ичида рекорд даражада қулади
Кеча, 21 февраль куни Россия фонд бозори Россиянинг Украинага яқинлашиб келаётган босқинидан хавотирлар кучайиши фонида сўнгги саккиз йилдаги энг тез суръатда қулади.
Москва биржасининг рубль индекси 10,5 фоизга пасайиб, 3036,88 пунктни ташкил этди. Бу Россия Украинанинг Қрим яриморолини аннексия қилган 2014 йил мартидан буён фоизларда бир кунлик энг катта пасайиш бўлди. Савдо мобайнидаги индикатор пасайиши 14% дан ошди, бу ҳам 2008 йил ноябрь ойидан бери энг юқори кўрсаткичдир.
РСТ (Россия савдо тизими) доллар индекси асосий сессия натижаларига кўра 13,2% йўқотиб, 1207,5 пунктгача тушиб кетди. Кун давомида у 17% дан пасайди, бу ҳам 2008 йил октябрь ойидан бери энг юқори кўрсаткичдир. Ўзгарувчан савдолар вақтида Украина гривнаси ҳам, Россия рубли ҳам арзонлашди.
Ўзини ДХР ва ЛХР деб эълон қилган ташкилотлар раҳбарлари Россия президенти Владимир Путинга уларнинг мустақиллигини тан олишни сўраб мурожаат қилгани ва Россия томонидан тан олинганидан сўнг фонд индексларининг тушиши тезлашди.
"Қуролли тўқнашув юз берган тақдирда, Россия активлари ҳозиргидан анча арзонлашади", дея TD Securities портфель стратегияси раҳбари Кристиан Маджио қилган башоратидан Bloomberg иқтибос келтиради.
Агентликнинг қайд этишича, ДХР ва ЛХР мустақиллигини тан олиниши Европа воситачилигидаги тинчлик музокараларининг бузилиши ва Ғарб билан муносабатлардаги кескинликни янада кучайишига олиб келиши мумкин.
