Самарқандда 24 соат ишлайдиган штаб қаерда?
Вилоят ҳокимининг 2023 йил 9 ноябрдаги фармойишига асосан, вилоят ҳудудида 10 ноябрдан ижтимоий соҳа объектларини ва тураржой биноларини иситиш мавсуми бошланди ҳамда шаҳар ва туманлар ҳокимликлари, коммунал соҳа корхоналарида штаблар ташкил этилган.
Энди бу штаблар аввалги йиллардагидек ҳокимиятларда эмас, балки шаҳар ва туман ички ишлар бўлимларида фаолият олиб боряпти.
- Самарқанд шаҳар ҳокимлигида куз-қиш мавсумида юзага келадиган айрим ноқулайлик ва муаммоларни тезкор бартараф этиб, аҳолига қулай шарт-шароитларни яратиш ҳамда янада сифатли хизмат кўрсатиш мақсадида ҳар йили штаб ташкил қилинар эди, - дейди Самарқанд шаҳар ҳокимлиги етакчи мутахассиси Баҳодир Эргашев. – Жорий йилда бу штаблар ички ишлар бўлимларида фаолият юритмоқда. Ёқилғи-энергия ресурсларидан фойдаланиш устидан давлат назоратини самарали ташкил этиш ва мувофиқлаштириш бўйича шаҳар штаби Самарқанд шаҳар ички ишлар органлари фаолиятини мувофиқлаштириш бошқармасида ташкил этилди.
Бунинг учун Самарқанд шаҳар ички ишлар бошқармасида махсус хона ажратилиб, зарур жиҳозлар, компьютер ва алоқа воситалари билан таъминланди.
- Янги ташкил этилган штабда «Ҳудудгаз Самарқанд» газ таъминоти филиали, вилоят ҳудудий электр тармоқлари корхонаси, «Самарқанд сув таъминоти» МЧЖ вакиллари келиб кеча-кундуз навбатчилик қилмоқда, - дейди ёқилғи-энергия ресурсларидан фойдаланиш устидан давлат назоратини самарали ташкил этиш ва мувофиқлаштириш бўйича шаҳар штаби раҳбари Элдор Раҳматов. - Аҳолидан турли соҳалар бўйича мурожаатлар бўляпти. Штаб фаолиятини бошлагандан шу кунга қадар 91 фуқаро томонидан мурожаат келиб тушди. Шундан 38 киши табиий ва суюлтирилган газ баллонлари хусусида мурожаат қилган бўлса, 2 нафар фуқаро ичимлик суви ва сув оқова, 51 нафар фуқаро электр энергияси узилиши туфайли келиб чиққан муаммолар хусусида мурожаат қилди.
Шаҳар ва туманларда коммунал соҳадаги ташкилотларда ҳам 24 соатлик навбатчилик ташкил этилган.
Агар сизда комуннал хизматлар юзасидан савол ва муаммолар бўлса, қуйидаги телефон рақамлари орқали Самарқанд шаҳар штабига боғланишингиз мумкин: (66) 234 95 16; (66) 234 95 17.
Дилмурод ТЎХТАЕВ.
