Самарқандда ишлаб чиқарилган маҳсулотлар анъанавий бозорлар ўрнига юқори қийматли GSP+ имкониятларидан фойдаланган ҳолда Европа давлатларига сотилади

Бу ҳақда халқ депутатлари вилоят Кенгашининг еттинчи сессиясида вилоят ҳокимининг ўринбосари – инвестициялар, саноат ва савдо бошқармаси бошлиғи О.Ҳамроев маълум қилди.

Айтилишича, жорий йил якуни билан вилоятда 850 млн. АҚШ долларлик маҳсулотлар экспортини амалга ошириш топшириғи турибди. Бу кўрсаткичга чиқиш учун, экспортга 100 та янги корхоналар жалб этилади, анъанавий бозорлар ўрнига Европанинг юқори қийматли Германия, Франция, Италия, Буюк Британия каби давлатларга GSP+ имкониятларидан кенг фойдаланган ҳолда экспорт ҳажмлари оширилади, халқаро кўргазма ва ярмаркаларда экспортчи корхоналар иштироки таъминланади, экспортёр корхоналардаги мавжуд муаммоларни тезкорлик билан ҳал этиб борилади.

Жорий йилнинг бошидан бугунги кунга қадар 15 та корхонанинг муаммолари ҳал қилинишида амалий ёрдамлар кўрсатилган. Мисол учун, “VINTRADITION” МЧЖ хорижий корхонаси учун хориждан келтирилган “Дистиллятсионная установка ДК-2 780” ускунаси тезлаштирилган тартибда сертификатлаштириб берилди. Жорий йилнинг 17 февраль ҳолатига 84 млн. АҚШ долларлик маҳсулотлар экспорт қилинган.