Самарқандда Space GameJam: ёшлар 48 соатда фазовий ўйинлар яратди
Самарқанд шаҳридаги “School 21” кампусида Space GameJam фазовий ўйинлар танлови ўтказилди.
Танлов Ўзбекистон Республикаси рақамли технологиялар вазирлиги ҳузуридаги “O‘zbekkosmos” космик тадқиқотлар ва технологиялар агентлиги, “School 21”, EastGames ҳамда Yandex Uzbekistan ҳамкорлигида ташкил этилди.
Унда мамлакатимизнинг турли ҳудудларидан келган 200 нафардан ортиқ иштирокчи 48 соат давомида космик йўналишдаги ўйинларнинг илк прототипларини яратиш бўйича ўз маҳоратларини синовдан ўтказди. Танлов дастурчилар, рассомлар, ўйин дизайнерлари, талабалар ва ўйинлар ҳамда космосга қизиқувчи ёшларнинг рағбатланитиришга қаратилган.
- Танловдан кўзланган мақсад ёшларга дастурлаш, ўйинлар ва космос – бу ҳақиқий лойиҳалар ва касблар эканлигини кўрсатиш, ушбу йўналишлар ҳозирда ва айнан шу ерда мавжудлигига гувоҳ бўлишларига эришишдан иборат, - дейди “School 21” ижрочи директори Зарина Лухманова. - GameJam формати – бу ғоя, жамоа, муддатлар ва 48 соатдан сўнг аниқ натижадан иборат бўлган, индустриянинг ихчамлаштирилган версияси ҳисобланади. Бу орқали биз келажакда амалга оширишимиз мумкин бўлган улкан лойиҳаларга асос солишимиз мумкин.
Низомга кўра, Space GameJam танловида иштирок этган энг яхши лойиҳалар коинотни ўрганиш бўйича миллий таълим платформаси – “Step to the Moon”га киритилиши ва мактаб ўқувчилари учун интерактив дастур сифатида мамлакат миқёсида оммалаштирилиши кўзда тутилган.
- Ўйин механизмлари нафақат ёшларни қизиқтириш, балки уларни физика, муҳандислик фанлари, астрономия ва рақамли технологияларни ўрганишга тизимли жалб этиш имконини беради, - дейди “O‘zbekkosmos” агентлигининг космик соҳада фан ва таълимни стратегик ривожлантириш бўлими бошлиғи Ҳумоюн Раҳмонов. - Ушбу танлов доирасида яратилган лойиҳалар келгусида йўқолиб кетмаслиги, аксинча, келажак мутахассисларини тайёрлаш ва ривожлантиришга хизмат қиладиган барқарор таълим воситаларига айланиши бугун олдимизда турган асосий вазифалардан бири ҳисобланади. Муҳими, танловга тақдим этилган 30 га яқин лойиҳаларнинг барчасида ўйин орқали фазони тадқиқ этишга қаратилган билимлар мужассам бўлган. Бу ўқувчиларни ўзига жалб этиш орқали таълимга қизиқишини ортишига ҳам хизмат қилади.
Space GameJam тадбири келгусида IT ва geymdev мутахассислари учун амалий мактаб вазифасини ўташ баробарида, болалар ва ўсмирлар орасида космосга бўлган қизиқишни ўстиришга хизмат қилади. Танловдаги энг яхши лойиҳалар ҳакамлар ҳайъати томонидан танланиб, лойиҳа муаллифлари муносиб тақдирланди.
- Танловда Мирзо Улуғбек номли ўйин лойиҳамиз билан иштирок этдик, - дейди “Cyber Ladies” жамоаси аъзоси Зиёда Нарзиқулова. – Барчага маълум, буюк мутафаккир Мирзо Улуғбек фазони ўрганиш борасида улкан тадқиқотларга асос солган. Афсуски, бугунги кунда фазони ўрганишга қизиқиш ёшлар ўртасида бироз сусайган. Буни кўпчилик техник тараққиёт таъсирида виртуал ўйинларга қизиқишнинг оқибати сифатида баҳолайди. Айнан шу жиҳатни ҳисобга олган ҳолда биз ушбу лойиҳага қўл урдик. Бу билан ўйин орқали фазовий билимларга бўлган қизиқишни оширишга ўз ҳиссамизни қўшишни мақсад қилдик. Ўйинимизда дастлаб юлдузлар туркуми бўйича шартларни бажариш талаб этилади ва бу жойда улар ҳақида маълумот бериб борилади. Ўйин сўнгида юлдузлар туркуми бўйича билимни мустаҳкамлашга қаратилган қисқа тест саволлари тақдим этилади. Биз бу ўйинимизни келгусида янада мукаммаллаштириб, фазовий билимлар билан бойитишни кўзлаганмиз.
Алишер Исроилов.
