Samarqandda Space GameJam: yoshlar 48 soatda fazoviy o‘yinlar yaratdi
Samarqand shahridagi “School 21” kampusida Space GameJam fazoviy o‘yinlar tanlovi o‘tkazildi.
Tanlov O‘zbekiston Respublikasi raqamli texnologiyalar vazirligi huzuridagi “O‘zbekkosmos” kosmik tadqiqotlar va texnologiyalar agentligi, “School 21”, EastGames hamda Yandex Uzbekistan hamkorligida tashkil etildi.
Unda mamlakatimizning turli hududlaridan kelgan 200 nafardan ortiq ishtirokchi 48 soat davomida kosmik yo‘nalishdagi o‘yinlarning ilk prototiplarini yaratish bo‘yicha o‘z mahoratlarini sinovdan o‘tkazdi. Tanlov dasturchilar, rassomlar, o‘yin dizaynerlari, talabalar va o‘yinlar hamda kosmosga qiziquvchi yoshlarning rag‘batlanitirishga qaratilgan.
- Tanlovdan ko‘zlangan maqsad yoshlarga dasturlash, o‘yinlar va kosmos – bu haqiqiy loyihalar va kasblar ekanligini ko‘rsatish, ushbu yo‘nalishlar hozirda va aynan shu yerda mavjudligiga guvoh bo‘lishlariga erishishdan iborat, - deydi “School 21” ijrochi direktori Zarina Luxmanova. - GameJam formati – bu g‘oya, jamoa, muddatlar va 48 soatdan so‘ng aniq natijadan iborat bo‘lgan, industriyaning ixchamlashtirilgan versiyasi hisoblanadi. Bu orqali biz kelajakda amalga oshirishimiz mumkin bo‘lgan ulkan loyihalarga asos solishimiz mumkin.
Nizomga ko‘ra, Space GameJam tanlovida ishtirok etgan eng yaxshi loyihalar koinotni o‘rganish bo‘yicha milliy ta’lim platformasi – “Step to the Moon”ga kiritilishi va maktab o‘quvchilari uchun interaktiv dastur sifatida mamlakat miqyosida ommalashtirilishi ko‘zda tutilgan.
- O‘yin mexanizmlari nafaqat yoshlarni qiziqtirish, balki ularni fizika, muhandislik fanlari, astronomiya va raqamli texnologiyalarni o‘rganishga tizimli jalb etish imkonini beradi, - deydi “O‘zbekkosmos” agentligining kosmik sohada fan va ta’limni strategik rivojlantirish bo‘limi boshlig‘i Humoyun Rahmonov. - Ushbu tanlov doirasida yaratilgan loyihalar kelgusida yo‘qolib ketmasligi, aksincha, kelajak mutaxassislarini tayyorlash va rivojlantirishga xizmat qiladigan barqaror ta’lim vositalariga aylanishi bugun oldimizda turgan asosiy vazifalardan biri hisoblanadi. Muhimi, tanlovga taqdim etilgan 30 ga yaqin loyihalarning barchasida o‘yin orqali fazoni tadqiq etishga qaratilgan bilimlar mujassam bo‘lgan. Bu o‘quvchilarni o‘ziga jalb etish orqali ta’limga qiziqishini ortishiga ham xizmat qiladi.
Space GameJam tadbiri kelgusida IT va geymdev mutaxassislari uchun amaliy maktab vazifasini o‘tash barobarida, bolalar va o‘smirlar orasida kosmosga bo‘lgan qiziqishni o‘stirishga xizmat qiladi. Tanlovdagi eng yaxshi loyihalar hakamlar hay’ati tomonidan tanlanib, loyiha mualliflari munosib taqdirlandi.
- Tanlovda Mirzo Ulug‘bek nomli o‘yin loyihamiz bilan ishtirok etdik, - deydi “Cyber Ladies” jamoasi a’zosi Ziyoda Narziqulova. – Barchaga ma’lum, buyuk mutafakkir Mirzo Ulug‘bek fazoni o‘rganish borasida ulkan tadqiqotlarga asos solgan. Afsuski, bugungi kunda fazoni o‘rganishga qiziqish yoshlar o‘rtasida biroz susaygan. Buni ko‘pchilik texnik taraqqiyot ta’sirida virtual o‘yinlarga qiziqishning oqibati sifatida baholaydi. Aynan shu jihatni hisobga olgan holda biz ushbu loyihaga qo‘l urdik. Bu bilan o‘yin orqali fazoviy bilimlarga bo‘lgan qiziqishni oshirishga o‘z hissamizni qo‘shishni maqsad qildik. O‘yinimizda dastlab yulduzlar turkumi bo‘yicha shartlarni bajarish talab etiladi va bu joyda ular haqida ma’lumot berib boriladi. O‘yin so‘ngida yulduzlar turkumi bo‘yicha bilimni mustahkamlashga qaratilgan qisqa test savollari taqdim etiladi. Biz bu o‘yinimizni kelgusida yanada mukammallashtirib, fazoviy bilimlar bilan boyitishni ko‘zlaganmiz.
Alisher Isroilov.
