Самарқандда “Турон” мактаб театри танловининг республика босқичи бошланди
Вилоят мусиқали драма театрида “Турон” мактаб театри" танловининг республика босқичи бошланди.
Дастлаб танловнинг республика босқичига чиққан 14 та жамоа таништирилди. Жамоалар танлов низомига кўра, “Бизнинг мактаб”, “Театр - ибратхона” шартлари бўйича ўзаро куч синашади. Уларнинг кетма-кетликдаги чиқишлари қуръа ташлаш йўли билан аниқланди.
Айтиш жоизки, “Турон” мактаб театри" танловининг республика босқичига санъатимиз дарғали бўлган санъаткорлар, яъни Баҳодир Нишонов, Зуҳра Ашурова, Шоҳида Исмоилова, Лола Элтоева, Барор Ҳасановлар ҳакамлик қиляпти.
- Саҳнада таниш-билиш кетмайди, - деди Ўзбекистон халқ артисти Зуҳра Ашурова. - Устозлар айтганидек, саҳна бу муқаддас даргоҳ. Унга хиёнат қилинмайди. Иштирокчиларнинг мактаб ўқувчилари эканини ҳисобга олган ҳолда иқтидорига қараб баҳолаймиз. Ҳамма жамоага омад тилайман.
Жамоалар “Бизнинг мактаб” шартида ўз мактаби ютуқларини кўрсатиб бериши ва бешта саволга жавоб топиши керак бўлса, “Театр - ибратхона” шартида бирор саҳна асаридан парча намойиш этишлари лозим.
