Самарқандда Хитойнинг "TIANNENG GROUP" компанияси билан ҳамкорлик истиқболлари муҳокама қилинди
Вилоят ҳокими Адиз Бобоев Хитойнинг ушбу нуфузли компанияси вакиллари билан учрашув ўтказди. Компаниянинг ижрочи директори Янг Жианфен билан бўлиб ўтган музокараларда ўзаро ҳамкорлик истиқболлари ҳамда вилоятда инвестиция лойиҳаларини амалга оширишнинг истиқболли йўналишлари муҳокама қилинди.
Учрашувда Янг Жианфен бугунги кунда Самарқанд вилоятида хорижий инвесторлар фаолияти учун қулай шароитлар яратилаётганини алоҳида таъкидлади. У мамлакатда амалга оширилаётган ислоҳотлар ва очиқ инвестиция сиёсати ҳудудларда йирик ҳамда узоқ муддатли бизнес лойиҳаларини рўёбга чиқариш учун мустаҳкам замин яратаётгани хусусида тўхталди. Янг Жианфен бунга яққол мисол сифатида ўзининг ҳамкори – "Zhejiang Junsheng Energy" корхонаси раҳбари 2025 йилнинг март ойида Самарқанд вилоятида пластмасса буюмлари ишлаб чиқарувчи инвестиция лойиҳасини амалга оширганини айтиб ўтди.
Шунингдек, Янг Жианфен Ўзбекистон иқтисодиёти ривожига ўз ҳиссасини қўшишга қизиқиш билдириб, ҳозирда компания вилоят бозорини ўрганаётгани, унинг эҳтиёжларини таҳлил қилаётгани ва истиқболли инвестициялар учун устувор йўналишларни кўриб чиқаётганини маълум қилди.
Ўз навбатида, Адиз Бобоев хорижий инвесторларга амалдаги қонунчилик доирасида ҳар томонлама амалий ёрдам кўрсатилишини таъкидлади. Жумладан, саноатни ривожлантириш, янги иш ўринлари яратиш ҳамда вилоятнинг экспорт салоҳиятини кенгайтиришга қаратилган истиқболли ташаббусларни амалга оширишда кўмак беришга тайёр эканини билдирди.
Учрашув якунида томонлар ўзаро манфаатли ҳамкорликни ривожлантириш ва икки томонлама мулоқотни давом эттиришга келишиб олдилар.
