Си Цзиньпин ва Трамп коронавирус билан боғлиқ вазиятни муҳокама қилди
ХХР раиси Си Цзиньпин АҚШ Президенти Дональд Трамп билан кечган телефон мулоқотида ХХРнинг коронавирусга қарши саъй-ҳаракатлари натижа бераётганини Хитой Марказий телевидениеси маълум қилди, деб ёзмоқда Sputnik.
Трамп ва Си Цзиньпинь ўртасидаги мулоқот 7 февраль куни бўлиб ўтган.
Хитой етакчиси касаллик авж олишни бошлаган илк кунданоқ мамлакат ҳукумати ва хитой халқи коронавирус туфайли келиб чиққан пневмониянинг тарқалишининг олдини олиш бўйича барча чораларни амалга ошираётганини қайд этган. Шунингдек, ушбу касалликнинг тарқалишига қарши курашда Хитой барча имкониятларга эгалигини ишонч билан қайд этган.
Ўз навбатида, Оқ уй матбуот хизмати Трамп Хитойнинг коронавирусга муваффақиятли қаршилик кўрсатишига ишонч билдиргани акс этган баёнотни эълон қилди. Икки етакчи томонлар ўртасида кўпқиррали алоқалар ва ҳамкорликни давом эттиришга келишиб олишгани қўшимча қилинган.
Эслатиб ўтамиз, Хитой ҳукумати 2019 йил 31 декабрь куни Бутунжаҳон соғлиқни сақлаш ташкилотини Хубэй провинцияси Ухань шаҳрида номаълум пневмония авж олгани ҳақида огоҳлантирганди. Мутахассислар касаллик қўзғатувчиси 2019-nCoV типидаги янги коронавирус эканлигини аниқлашган. Хитойда бу вирусдан касалланганлар сони 31,1 мингдан ошди, улардан 636 нафари вафот этди.
