Si Szinpin va Tramp koronavirus bilan bog‘liq vaziyatni muhokama qildi
XXR raisi Si Szinpin AQSh Prezidenti Donald Tramp bilan kechgan telefon muloqotida XXRning koronavirusga qarshi sa’y-harakatlari natija berayotganini Xitoy Markaziy televideniyesi ma’lum qildi, deb yozmoqda Sputnik.
Tramp va Si Szinpin o‘rtasidagi muloqot 7 fevral kuni bo‘lib o‘tgan.
Xitoy yetakchisi kasallik avj olishni boshlagan ilk kundanoq mamlakat hukumati va xitoy xalqi koronavirus tufayli kelib chiqqan pnevmoniyaning tarqalishining oldini olish bo‘yicha barcha choralarni amalga oshirayotganini qayd etgan. Shuningdek, ushbu kasallikning tarqalishiga qarshi kurashda Xitoy barcha imkoniyatlarga egaligini ishonch bilan qayd etgan.
O‘z navbatida, Oq uy matbuot xizmati Tramp Xitoyning koronavirusga muvaffaqiyatli qarshilik ko‘rsatishiga ishonch bildirgani aks etgan bayonotni e’lon qildi. Ikki yetakchi tomonlar o‘rtasida ko‘pqirrali aloqalar va hamkorlikni davom ettirishga kelishib olishgani qo‘shimcha qilingan.
Eslatib o‘tamiz, Xitoy hukumati 2019 yil 31 dekabr kuni Butunjahon sog‘liqni saqlash tashkilotini Xubey provinsiyasi Uxan shahrida noma’lum pnevmoniya avj olgani haqida ogohlantirgandi. Mutaxassislar kasallik qo‘zg‘atuvchisi 2019-nCoV tipidagi yangi koronavirus ekanligini aniqlashgan. Xitoyda bu virusdan kasallanganlar soni 31,1 mingdan oshdi, ulardan 636 nafari vafot etdi.
