Сирдарёда сув тошқинининг дастлабки зарарлари эълон қилинди
«Сардоба» сув омборининг ёрилиши натижасида тошқин оқибатларини бартараф этиш ишлари олиб борилмоқда, дея хабар қилди Ўзбекистон Фавқулодда вазиятлар вазирлиги матбуот хизмати.
Ҳодиса жойида Фавқулодда вазиятлар, Мудофаа, Ички ишлар вазирликлари, Миллий гвардия ва бошқа давлат хизматларининг 2 мингга яқин махсус техникаси ишламоқда. Шунингдек, ушбу ҳудудда ёнғин ўчириш машиналари ва мотопомпа ёрдамида тошқин суви уйлардан, инфратузилма объектларидан чиқарилиб, суғориш ва дренаж тизимлари тозаланмоқда.
Бунга қўшимча равишда электр тармоқлари, газ, сув қувурлари ва бошқа турдаги коммунал тармоқларини тиклаш бўйича кенг кўламли ишлар олиб борилмоқда. Ҳозирда тошқиндан зарарланган 58 та базавий мобил станциясидан 48 таси аллақачон таъмирланди.
Шу билан бирга, ишдан чиққан бошқа инфратузилма объектларига етказилган зарар миқдорини баҳолаш ишлари олиб борилмоқда. Дастлабки ҳисоб-китобларга кўра, зарар етган инфратузилма объэктларига 8 та болалар боғчаси, 16 та мактаб, 7 та тиббиёт муассасаси, 1 та коллеж, 7 та қабристон, 3 та масжид, 13 та республика аҳамиятидаги кўприк, 52 километр узунликдаги йўл, 1 та деҳқон бозорини киритиш мумкин. Шунингдек, 99 та кўп қаватли турар-жой биносига қисман зарар етган.
Маълумот учун, Сирдарё вилоятининг сув тошқини бўлган ҳудудларига жойлардан инсонпарварлик ёрдамлари келиши давом этмоқда. Бугунга қадар Сирдарё вилоятига 180 тонна ун, 48 тонна макарон маҳсулотлари, 63 тонна ўсимлик мойи, 47 тонна гуруч, 37 тонна гўшт, 58 тонна шакар, 228 тонна картошка, 176 тонна пиёз ва бошқа маҳсулотлар етказиб берилди.
