АҚШ Сенати президент ваколатларини чеклашга қарор қилди
Америкалик сенаторлар АҚШ президентининг ҳарбий куч ишлатишда ваколатларини чеклашни илгари сурди. Бу ҳақдаги тегишли қонун лойиҳаси муаллифлари - демократ Тим Кейн ва республикачи Тодд Янг, деб хабар берди “ТАСС”.
Қонунчиликни ўзгартиришга сабаб АҚШ президенти Жо Байденнинг буйруғи билан Сурияга амалга оширилган ҳаво ҳужумлари бўлди. "Ҳаво ҳужумлари шуни кўрсатадики, партиядан қатъи назар, ижро этувчи ҳукумат ўз ҳарбий ваколатларини кенгайтиришда давом этади", дейилди Сенатда. Лойиҳа муаллифларининг фикрига кўра, амалдаги қонунлар мамлакатга Яқин Шарқда йигирма йил давомида "чексиз урушлар" олиб боришга имкон беради.
Гап 2001 йил сентябрь ойида АҚШда содир бўлган қатор терактлардан сўнг Конгресс томонидан қабул қилинган «Америка президенти қонун чиқарувчилар розилигисиз ҳарбий куч ишлатиши мумкин» бўлган ташаббусни бекор қилиш ҳақида кетмоқда.
АҚШ ҳарбийлари 26 февралга ўтар кечаси Сурия ҳудудига авиазарбалар берди. Уларнинг мақсади Эрон томонидан қўллаб-қувватланадиган ҳарбийлар инфратузилмаси эди. Ҳаво ҳужумида камида 17 киши ҳалок бўлди. Пентагоннинг таъкидлашича, зарбалар АҚШ ва Ироқдаги коалиция вакилларига қарши сўнгги ҳужумларга жавобан бўлган.
