Арзон иссиқхонани қандай қуриш мумкин?

Мен айтаётганим катта майдонда жойлашадиган, табиий газ ёки бошқа ёқилғи билан иситиладиган "теплица" эмас, ҳеч қандай ёқилғисиз иситиладиган, камхарж иссиқхонадир. Қарамоғимиздаги соғин сигирни сотиб, 2017 йил февраль ойида иссиқхона қуришни бошладик. 
Бозордан ток вайишига ишлатиладиган 13 та металл қувур олиб келиб, ёйма конструкциясини ясашди. Уларни бир-бирига ушлатиш учун бозордан 300 минг сўмга сим 1 миллион 300 минг сўмга икки хил қалинликдаги полиэтилен плёнка олиб келдик. Пайвандчи уста топиб келиб, бир неча кунда икки сотихли иссиқхонани қурдик. Дарвоқе, биз ерни ковламасдан, ер юзасига иссиқхона ташкил этдик. Чунки Қорадарёга яқин жойда турамиз, ер ости сувлари яқин.
Иссиқхона тайёр бўлгач, ерни гўнг ва минерал ўғит билан бойитдик. 2017 йил 7 март куни 600 сўмдан 450 дона помидор кўчати олиб келиб, 60 сантиметр оралиқда 8 қатор қилиб экдик. Иссиқхона қуришдан кўчатни эккунимизгача 4 миллион 300 минг сўм маблағ сарфладик. Помидор пишгунча 2 марта суғориб, 2 марта чопиқ қилдик. Май ойининг якуни, июннинг бошланиши билан помидор пишди. Ҳар куни ҳосилни териб, "Иштихон деҳқон бозори"да килограмини 6 минг сўмдан, уйда 4-5 минг сўмдан сотдик. Мўъжазгина иссиқхонанинг ўзидан 4,5 миллион сўм даромад олдик. Биринчи йилнинг ўзида харажатимиз қопланди. 

Санобар МУРОДОВА, 
Иштихон тумани, Қозоқовул қишлоғи. 

2017 йилда вилоятда 25 629 кишига 148 миллиард 491 миллион сўм микрокредитлар ажратилди. 
Шундан 15 миллиард 320 миллион сўм маблағ ҳисобидан 2 377 та иссиқхона ташкил этилди.