Британиялик мутахассис қўл бериб кўришишдан бутунлай воз кечишга чақирди
Лондондаги гигиена ва тропик медицина мактаби микробиологи Бэрон Пиотнинг фикрига кўра, Буюк Британия келажакда пандемияларнинг олдини олиши учун бир қатор одатлардан воз кечмоғи лозим. Хусусан, қўл бериб кўришишдан воз кечиш керак.
Мутахассис, анъанавий қўл бериб кўришишни японча усулдаги кўришишга алмаштириш кераклигини таъкидлаб ўтди. Бундан ташқари, респиратор касалликлар тарқалган вақтда ҳимоя ниқобларини тақиш ва ижтимоий масофага амал қилиш одатий ҳолга айланиши зарур.
Пиот сўзларига исбот тариқасида ижтимоий масофа ва ниқоб тақиш амалиёти кенг қўлланилаётган ва грипп каби юқумли касалликлар кўрсаткичи кескин камайиб кетган Австралия статистикасини келтириб ўтди. Мутахассиснинг сўзларига кўра, шахсий гигиенага амал қилиб, ниқоб тақиб ва ижтимоий масофа қоидаларига кенг кўламда амал қилинса, коронавирус тарқалиши кескин қисқаради.
Тақдим этилган сўнгги маълумотга кўра, бугунги кунга келиб Буюк Британияда 297 146 нафар коронавирус ҳолати аниқланган.
