Евгений Пригожин самолёти ҳалокатга учради. У ҳалок бўлдими?
Чоршанба куни кечқурун Тверь яқинида Embraer Legacy 600 реактив двигателли самолёти ҳалокатга учради. Самолёт ҳавода парчаланиб кетган. Борт “Вагнер” хусусий ҳарбий компания асосчиси Евгений Пригожин билан боғлиқ.
“Росавиация” самолёт йўловчилари рўйхатида шундай исм-фамилия бўлганини хабар қилади. Ҳаммаси бўлиб етти йўловчи ва уч нафар экипаж аъзоси бўлган. Дастлабки маълумотларга кўра, ҳалокатда ҳеч ким омон қолмаган, аммо “Вагнер” асосчиси ўлими ҳақидаги расмий хабар ҳали тасдиқланмаган. Унинг авиаҳалокат натижасида вафот этгани ҳақида бир қанча оммавий ахборот воситалари, жумладан, Пригожиннинг ўзига яқин бўлганлар аноним манбаларга таяниб хабар беришмоқда.
Одатда саёҳат пайтида Пригожин дублёрдан фойдаланган ва бошқа номдаги паспортлар билан йўловчи сифатида учган.
Айрим хабарларга кўра, “Вагнер” командири, РФ Қуролли Кучлари Бош штаби Бош бошқармасининг Россия махсус кучлари зобити, захирадаги подполковник Дмитрий Уткин ҳам Пригожин билан бирга бўлган ва ҳалок бўлган. Уларнинг ҳалок бўлганлигини Кремль томонидан тайинланган Запорожье ишғол маъмуриятида бош кенгаш аъзоси лавозимини эгаллаган Владимир Рогов ҳам маълум қилган.
Россия ҳукумати Пригожин ва Уткиннинг ўлимини тасдиқламаган. Пригожин самолётининг ҳалокати "Вагнер" асосчисининг исёнидан роппа-роса икки ой ўтгач содир бўлди.
