Андроид қурилмалар учун Zarnews.uz мобил иловаси. Юклаб олиш x

«Ҳизб ут-Таҳрир» аъзоси озодликдан маҳрум этилди

Жорий йилнинг февраль ойида хориж давлатлари ҳуқуқни муҳофаза қилиш идоралари билан амалга оширилган тезкор тадбирлар натижасида Паст Дарғом туманида истиқомат қилган, фаолияти тақиқланган «Ҳизб ут-Таҳрир» диний-экстремистик ташкилоти аъзоси Паст Дарғом тумани, Қорабўйин қишлоғида яшаган Абдуллаев Обид Усмоновичнинг жиноий фаолиятига чек қўйилган эди.

Тергов жараёнида маълум бўлишича, О.Абдуллаев Россиянинг Санкт-Петербург шаҳрида ишлаши давомида Интернетнинг “Facebook” ва «Одноклассники» ижтимоий тармоқларида «Ҳизб ут-Таҳрир»нинг аудио-видео материалларини тарқатиб келган. Шунингдек, у оила аъзолари, хусусан, фарзандларига «Ҳизб ут-Тахрир»нинг «Ислом низоми» китоби ва «Ал-Ваъй» номли журналидан экстремистик ғояларни сингдириб келган.

О.Абдуллаевнинг жиноий ҳаракатлари «Ҳизб ут-Таҳрир»нинг фаол ёлловчилари ҳисобланган, айни пайтда халқаро қидирувда бўлган қуйидаги шахслар томонидан бошқарилган.

Улар: «Маҳмуд Абдулмўмин» тахаллусли 1980 йилда Қирғизистон Республикасида туғилган, Холдаров Махмуджон Абдумаликович ва «Устоз Саид ака» тахаллусли 1964 йилда Фарғона вилояти Олтиариқ туманида туғилган Мамаризаев Мухамад Ҳомидович.

Жорий йилнинг июль ойида О.Абдуллаевнинг жиноий қилмишлари Жиноят ишлари бўйича Самарқанд вилоят суди томонидан кўриб чиқилиб, у 6 йил муддатга озодликдан маҳрум қилиш жазосига ҳукм қилинди.