Имкон беринг ёшларимизга!

Ёшлар бизнинг келажагимиз,
Давомчимиз, бўлажагимиз,
Эртамизни қуражагимиз,
Имкон беринг ёшларимизга!

Юртни буюк ишга бошласин,
Кўролмаслар кўзин ёшласин,
Фақат олға қадам ташласин,
Имкон беринг ёшларимизга!

Ҳар мақсадга аҳдли бўлишсин,
Шамоллардек шаҳдли бўлишсин,
Қайда бўлсин, бахтли бўлишсин,
Имкон беринг ёшларимизга!

Қўйиб беринг, ёв бўлманг сизлар,
Эзгу йўлда ов бўлманг сизлар,
Ҳалал берманг, ғов бўлманг сизлар,
Имкон беринг ёшларимизга!

Бир кун келиб сизни қўллайди,
Ҳар сўзингиз Ҳақга йўллайди,
Улар борки халқим гуллайди,
Имкон беринг ёшларимизга!

Ҳамдам Аллаёр,

Нуробод тумани.