Жаҳон чемпионатидаги иштирокимиз ва илк голимиз ҳам тарихий ғалаба
Ўзбекистон миллий терма жамоасининг 2026 йилги жаҳон чемпионатига йўлланма олиши бутун халқимиз орзу қилган тарихий ютуқ бўлди. Бу нафақат минглаб футбол мухлисларининг интизори, балки спортчилар, мураббийлар ва соҳа мутахассисларининг кўп йиллик меҳнати ҳамда ўзбек футболига қаратилаётган эътибор самарасидир.
Айни кунларда Америка, Канада ва Мексика майдонларида ўтказилаётган мундиалдаги илк баҳсда терма жамоамиз кучли ва тажрибали рақиб Колумбия терма жамоасига қарши майдонга тушди. Учрашув 3:1 ҳисобида рақиб фойдасига ҳал бўлди. Албатта, ҳар бир мухлис ғалабани истайди. Аммо мазкур ўйин натижасига фақат ҳисоб нуқтаи назаридан қараш тўғри бўлмайди.
Муҳими, ушбу баҳсда ўзбек футболининг янги тарихи ёзилди. Аббосбек Файзуллаев жаҳон чемпионатида Ўзбекистон миллий терма жамоасининг илк голига муаллифлик қилди. Бу гол мамлакат футбол тарихи учун ҳам унутилмас воқеа бўлиб қолди. Президентимиз Шавкат Мирзиёев ҳам буни алоҳида эътироф этди.
— Футболчиларимиз жуда катта тажрибали жамоага қарши кучли характерини кўрсатди. Биз учун биринчи жаҳон чемпионатида биринчи голимиз — бу ҳам ғалаба, — деди давлатимиз раҳбари футболчиларни руҳлантириб.
Ўйиндан кейин терма жамоамиз бош мураббийи, италиялик мутахассис Фабио Каннаваро учрашув ҳақида фикр билдириб, жамоа иккинчи бўлимда ўйинни ўзгартира олганини таъкидлади.
- Ўйин қизиқарли ўтди. Иккинчи бўлимда биз ўйинни ўзгартиришга эришдик, - деди у. - Биз Ўзбекистонни бутун дунёга ижобий намойиш этиш учун бу ерга келдик. Доим жамоамга ўйин давомида фаол ҳаракат қилиш кераклигини айтаман. Колумбия каби жамоаларга қарши ўйнаш, тўпсиз ҳаракат қилиш осонмас. Умуман, иккинчи бўлимда яхши ҳаракат қилдик, афсуски, гол ўтказиб юбордик. Ушбу ўйинни эслаб қоламиз. Чунки бу тарихий ўйин. Биз жаҳон чемпионатидамиз. Бугунги ўйин биз учун яхши бўлди, деб айта оламан. Хатолар бўлди, улар устида ишлаймиз. Футболчиларимдан ғурурланаман. Улар яхши ўйнашди. Бугун қийин ўйин бўлди. Бундай стадионда, мухлислар қаршисида ўйнаш осон эмас. Лекин бу сизга кўпроқ мотивация бериши ҳам мумкин.
Айрим мухлислар ва ижтимоий тармоқ фойдаланувчилари эса илк мағлубиятдан кейин танқидий фикрлар билдирди. Албатта, бу табиий ҳол. Лекин халқимизнинг узоқ йиллик орзусини айнан шу жамоа ҳақиқатга айлантирди. Бугун танқид қилинаётган футболчилар кеча миллионлаб юртдошларимизни қувонтирган, мамлакат тарихида илк бор мундиалга олиб чиққан авлод вакиллари эканлигини унутмаслик керак.
Қолаверса, Ўзбекистон тушиб қолган гуруҳдаги рақиблар оддий жамоалар эмас. Колумбия ва Португалия каби терма жамоалар мунтазам жаҳон чемпионатларида иштирок этиб келади, таркибида дунё даражасидаги футболчилар тўп суришади. Бу каби рақибларга қарши ўйинлар ўзбек футболчилари учун катта тажриба мактаби ҳисобланади.
Энг қувонарлиси, футболчиларнинг ўзида ҳам ишонч сўнмаган. Аббосбек Файзуллаев, Азизбек Амонов, Элдор Шомуродов, Рустам Ашурматов каби етакчилар кейинги баҳсларга юқори кайфият ва ғалабага иштиёқ билан майдонга тушишини таъкидлади. Демак, жамоада руҳий муҳит яхши, мақсад эса аниқ.
Спорт фақат рақобат эмас, балки маданият ва ҳурмат ҳамдир. Колумбияга қарши ўйиндан кейин ижтимоий тармоқларда тарқалган бир лавҳа бунинг ёрқин исботи бўлди. Рақиб жамоа гол урган пайтда трибунадаги ёш ўзбекистонлик болакай кўз ёши қилди. Шу пайт колумбиялик мухлислар уни тасалли бериб, бир неча бор «Ўзбекистон! Ўзбекистон!» деб қўллаб-қувватлади.
Ана шу ҳолат футболнинг ҳақиқий моҳиятини намоён этади. Майдонда рақобат бўлиши мумкин, аммо инсонлар ўртасида ҳурмат сақланиб қолиши керак. Ғалаба ҳам, мағлубият ҳам ўтади, аммо ҳурмат ва инсонийлик қадри қолади.
Терма жамоамиз олдида Португалия ва Конго ДР терма жамоаларига қарши баҳслар турибди. Албатта, бу ўйинлар ҳам осон кечмайди. Лекин футболчиларимиз мундиалнинг илк баҳсидаёқ қўрқмасдан ўйнай олишини, рақибга муносиб қаршилик кўрсатишини исботлади. Шундай экан, танқиддан кўра, кўпроқ яхши ният ва дуода бўлиб, жамоамизни қўллаб-қувватлайлик.
Олға, Ўзбекистон, омад йигитлар!
Фазлиддин Рўзибоев.
