Жомбойлик гулчи Муборак Ўроқова “Ишбилармон аёл” кўрик танлови туман босқичи ғолиби бўлди

O’zLiDeP Жомбой туман Кенгаши “Аёллар қаноти” томонидан Тадбиркорлар ва ишбилармонлар ҳаракати Ўзбекистон-либерал демократик партияси  Сиёсий Кенгаши Ижроия Қўмитаси томонидан анъанавий тарзда ўтказиб келинаётган “Ишбилармон аёл” республика кўрик танловининг туман босқичи бўлиб ўтди.

Туман марказий истироҳат боғида танлов муносабати билан  фермерлар , чеварлар, ҳунармандлар, тадбиркорлар  томонидан кўргазма  ташкил қилинди. Тадбирда гулчи Муборак Ўроқовалар оиласи биринчи ўринни эгаллади.

Муборак Ўроқова турмуш ўртоғи ва фарзандлари билан 5 йилдан буён гулларнинг  50 га яқин турларини етиштиради. Уларнинг 15 тури хона гуллари бўлиб, қолган 40 дан ортиғи  декоратив гуллар ҳисобланади.           

- Гулчилик  Жомбойда қолаверса, вилоятда сердаромад бизнес ҳисобланмайди. Гул бизнесининг маълум мавсуми бор.  Аммо бу бизнинг оиламизни ташвишга солмайди. Гул етиштириш бизга шунчаки қизиқиш, биз бундан ўзгача завқ-шавқ оламиз. Шу боис томорқамизда ҳам иссиқхонамиз гуллар билан тўла, - деди М.Ўроқова.

 Танлов натижаларига кўра  2- ўринга тикувчи Азиза Нурматова муносиб деб топилган бўлса,  3-ўринга “Нина замини” фермер хўжалиги раиси Салима Умарова лойиқ деб топилди.

Бахтигул Қаршиева,

O’zLiDeP Самарқанд вилоят Кенгаши матбуот котиби.