Касаба уюшмалари фаоллари самарқанд тажрибасини ўрганишди

Кенгашнинг барча вилоятлар бўйича масъуллари қатнашган семинарда Самарқанддаги таълим, фан ва маданият йўналишида фаолият олиб бораётган корхоналарнинг бошланғич касаба уюшма ташкилотлари иши ўрганилди. Хусусан, семинар иштирокчилари «Зарафшон» ва «Самаркандский вестник» газеталари бирлашган таҳририятида бўлиб, бу ерда ишчи ходимлар учун яратилган шарт-шароитлар билан танишдилар. Семинарда Ўзбекистон таълим, фан ва маданият ходимлари касаба уюшмаси республика кенгаши раиси Р.Бедилов, вилоят касаба уюшмалари ташкилотлари бирлашмаси кенгаши раиси С.Рафиқов ва бошқалар бошланғич ташкилотлар фаолияти, ташкилотларда касаба уюшмаси ҳамда иш берувчи ўртасида тузилаётган жамоа шартномаларининг аҳамиятига тўхталиб ўтди. 
Ўзбекистон таълим, фан ва маданият ходимлари касаба уюшмаси республика кенгаши томонидан таҳририятнинг бир гуруҳ фаол ходимларига фахрий ёрлиқ ва эсдалик совғалари топширилди. Шунингдек, семинар иштирокчилари Самарқанд шаҳридаги 21-умумтаълим мактаби бошланғич касаба уюшма ташкилоти фаолиятини ўрганди. Самарқанд давлат чет тиллар институтида республика кенгаши раёсатининг ўнинчи йиғилиши бўлиб ўтди.