Кичик қадамлар билан катта мақсадларга эришаётган аёл

Ҳар бир маҳалланинг юраги унинг фидойи инсонлари саналади. Бугун Каттақўрғон шаҳридаги Меҳржон маҳалласида шундай фидойилардан бири, ўз ишига муҳаббат ва жасорат билан ёндашган Нигора Тўхтаева номи ҳурмат билан тилга олинмоқда.

Унинг қўл меҳнати, шижоати орқали яратилган кичик тикув цехи бугун нафақат оиласига, балки маҳалладаги хотин-қизларга ҳам фойдали масканга айланди. Энг диққатга сазовори Нигора опа ўз фаолияти орқали 5 нафар хотин-қиз учун иш ўрни яратди.

Каттақўрғон шаҳар кенгаши депутати Дилафруз Анзиратова ижтимоий соҳа объектлари, аҳоли хонадонларида учрашув ўтказиб, мазкур тикув цехи фаолиятини ҳам кўздан кечирди.

- Менга "Аёллар дафтари" орқали берилган ёрдам ҳақиқий бурилиш нуқтаси бўлди, - дейди Нигора Тўхтаева. - Ғояларим бор эди, лекин имкониятим чекланганди. Менга берилган қўллаб-қувватлаш ишимга қанот бағишлади — янги ускуналар олдим, ишим тизимга тушди, энг муҳими, атрофимда меҳнатга интилган қизлар жамоаси вужудга келди. Бугун шу кичик цехда хотин-қизлар ишлаётганини кўриб, руҳланаман, фахрланаман. Режаларим катта — ишни кенгайтириб, янада кўпроқ хотин-қизларга иш ва умид бағишлашни ният қилганман.

Аслида эса бундай мисоллар йўқдан пайдо бўлмайди. Улар меҳнат, матонат ва эътиқоднинг маҳсули Н.Тўхтаева каби аёллар мамлакатимизда хотин-қизларни қўллаб-қувватлашнинг самарадорлигини амалда исбот қилмоқда.

Лола Сайидова.