МИБ ходимлари ҳақорат қилиниб, калтакланди

Қашқадарё вилоятида МИБ инспекторларига жароҳат етказилди. Бу ҳақда Бош прокуратура матбуот хизмати хабар қилди.

Маълум бўлишича, 2019 йил 23 август куни соат 17:30 ларда МИБ Косон туман бўлими давлат инспекторлари туманнинг Қуйибоғ маҳалласида яшовчи фуқаро Ж.Қ.нинг хонадонига электр энергиясидан фойдаланиш ҳолатларининг қонунийлигини текшириш учун борганларида, унинг электр энергиясидан ноқонуний фойдаланиб келаётганлиги аниқланиб, ҳолат юзасидан далолатнома расмийлаштираётганларида, Ж.Қ.нинг укаси С.Қ. (1985 й.т.) аралашиб, давлат инспекторларини қўпол сўзлар билан ҳақоратлаб, уларнинг танасининг турли қисмларига тан жароҳатлари етказган.

Мазкур ҳолат юзасидан 27.08.2019 йилда туман прокуратураси томонидан Жиноят кодексининг 219-моддаси 1-қисми билан жиноят иши қўзғатилган.

Тергов ҳаракатлари давом этмоқда.