Оқибатини била туриб...

Хусусан, аср вабосига айланган ОИТС ва ундан қандай ҳимояланиш тўғрисида маҳаллаларда, ташкилотларда, таълим муассасаларида мутахассислар иштирокида давра суҳбатлари олиб борилиб, ёшларга тушунча берилмоқда. Аммо бу бедаво дард билан касалланаётган одамлар кўпайиб бормоқда. 
Яқинда бир дугонамнинг ОИТС билан касалланганлигини эшитиб қолдим. Биз коллежда тиббиёт йўналиши бўйича бирга ўқиганмиз. ОИТС ва унинг юқиш йўллари тўғрисида етарлича маълумотга эга бўлганмиз. Касалликнинг бедаво эканлигини ҳам ўргатишган. Ўша дугонам турмушга чиққандан сўнг, ҳозирги кунда аёллар ўртасида урф бўлган татуаждан фойдаланди ва касаллик юқтирди. Касалликнинг яширин даврида бу вирусни у турмуш ўртоғига ҳам юқтирган. Бу орада улар фарзандли ҳам бўлишди. Натижада бир оила ОИТС билан касалланиб, барбод бўлди.
Воқеани эшитиб, бир ҳолат ёдимга тушди. Коллежда битирувчи босқичда ўқиётганимда бизга дипломолди битирув амалиёти берилди. Мен ҳам амалиётни ўташ учун туман поликлиникасига бордим. Поликлиникага икки ёш никоҳдан ўтиш учун тиббий кўрикка келди. Таҳлиллар натижасида йигитда ОИТС касаллиги аниқланди. Бироқ қиз тўйни тўхтатишни истамади. 
Ҳаёт деган неъматнинг қадрига етиб, унинг гўзалликларидан баҳра олиш ўрнига, кўра-била туриб, ўзини ўлимга маҳкум этишни қандай тушуниш мумкин? 

Шаҳноза ЭРГАШЕВА,
СамҚХИ талабаси.