Ўтган йил августда Норвегиядаги масжидлардан бирида отишма уюштирган Филип Мансхаусга суд ҳукми ўқилди
2019 йил август ойида Норвегиянинг Осло шаҳарчасидаги масжидда отишма уюштирган ва ўзининг тутинган синглисини ўлдирганликда айбланган Филип Мансхаус Норвегия қонунчилигида назарда тутилган энг узоқ муддатли - 21 йил қамоқ жазосига ҳукм қилинди. Бу ҳақда NRK телерадиокомпанияси хабар берди.
“Филип Мансхаус 21 йиллик қамоқ жазосига ҳукм қилинди. Ҳукм бир овоздан маъқулланди. Шунингдек, у қурбон бўлганларнинг оила аъзоларига товон пули ва суд харажатларини тўлаши лозим”, дея хабар берди телерадиокомпания.
Норвегия қонунчилигига кўра, мазкур жазо ўта хавфли жиноятчилар учун қўлланилиши мумкин бўлган энг оғир жазо. Қораловчи томоннинг фикрича, Мансхаус ишида жазони енгиллаштирувчи ҳолат мавжуд эмас. Жиноятчининг адвокати мижозининг ақли заиф эканлигини ва у мажбурий даволанишга юборилиши лозимлигини айтди.
Мансхаус устидан суд иши 7 май куни бошланган эди. Унга нисбатан террорчилик ҳаракатини амалга ошириш, қотиллик ва қотилликка уриниш айблари эълон қилинди. Тергов ҳаракати тақдим этган маълумотга кўра, у 2019 йилнинг 10 август куни ўзининг тутинган синглисини отиб ўлдирган. Сўнгра маҳаллий масжидлардан бирига бориб, бир неча бор қуролдан ўқ узган.
