ОТМга ҳужжат топшириш муддати тугаяпти. Мактаб битирувчилари улгуряптими?
Самарқанд вилояти халқ таълими бошқармасида ZOOM платформаси орқали онлайн йиғилиш ўтказилди. Унда бошқарма бўлим бошлиқлари ва мутахассислари, халқ таълими бўлими мудирлари иштирок этди.
Йиғилишда бошқарма бошлиғи Саидаҳмад Усмонов мактаб битирувчиларининг олий таълим муассасаларига ўқишга ҳужжат топшириш ҳолатини танқидий муҳокама қилди.
Таъкидланишича, 2019-2020 ўқув йилида вилоят мактабларининг 11-синфини 53583 нафар ўқувчи битирди. Ўтказилган сўровномалар натижасига кўра, 46552 нафар битирувчи ОТМда ўқиш, 2612 нафари эса касб-ҳунар мактаблари ва техникумларда ўқиш, шунингдек, 4414 нафари ишга жойлашиш истагини билдирган.
— 2020 йил 16 июль ҳолатига кўра, ОТМда ўқиш истагини билдирган битирувчиларимиздан 34869 нафари ҳужжат топширган, — деди бошқарма бошлиғининг биринчи ўринбосари Қ.Саидов. — Бу уларнинг 65 фоизини ташкил қилади. Агар жорий йилнинг 20 июль куни ОТМга ҳужжат топшириш якунланишини инобатга олсак, қолган 35 фоиз битирувчимиз қачон ҳужжат топширишга улгуради, деган савол туғилади. Ваҳоланки, ушбу йўналишда кенг имконият яратилиб, ҳужжатларни қабул қилишнинг онлайн шакли — осон ва ортиқча оворагарчиликларсиз топшириш амалиёти жорий қилинган. Бунга халқ таълими бўлими мудирлари қандай изоҳ билдиради?
Ачинарлиси, Булунғур тумани мактабларининг ОТМда ўқимоқчи бўлган 2688 нафар битирувчисидан 780 нафари, пайариқлик 3562 нафар мактаб битирувчисидан 1337 нафари ҳужжат топширган, холос. Самарқанд ва Каттақўрғон шаҳарлари, Қўшработ, Паст Дарғом туманларида ҳам бу борадаги ҳолат қониқарли эмас.
Онлайн йиғилишда Булунғур ва Пайариқ туманлари халқ таълими бўлими мудирлари қатъий огоҳлантирилди.
Умумтаълим муассасаларининг янги ўқув йилига тайёргарлиги, таълим сифати ва самарадорлигини оширишга доир масалалар муҳокама этилиб, аниқ вазифалар белгилаб олинди.
Шунингдек, умумтаълим муассасалари ҳудудида эски ва фойдаланишга яроқсиз деб топилиб, вилоят ҳокимининг тегишли қарорига асосан бузилиши лозим бўлган биноларни бузиш айрим туманларда пайсалга солиб келинаётгани таъкидланди. Ушбу масалада зудлик билан амалга оширилиши лозим бўлган вазифаларга тўхталиб ўтилди.
Ўқувчиларни касб-ҳунар мактабларига тавсия асосида жалб қилиш, бу борадаги муҳим масалалар юзасидан касбий таълимни ривожлантириш ва мувофиқлаштириш вилоят ҳудудий бошқармаси бошлиғи Азиз Насимов ўзининг таклифларини билдирди.
Дарҳақиқат, 2019-2020 ўқув йилида вилоятдаги умумтаълим мактабларининг 9-синфини 55598 нафар ўқувчи битирди. Уларнинг 2454 нафари академик лицейларда, 1425 нафари эса касб-ҳунар мактабларида ўқишни давом эттириш истагини билдирган. Қолганлари эса мактабда ўқишини давом эттиради.
Самарқанд вилояти халқ таълими бошқармаси ахборот хизмати.
