OTMga hujjat topshirish muddati tugayapti. Maktab bitiruvchilari ulguryaptimi?
Samarqand viloyati xalq ta’limi boshqarmasida ZOOM platformasi orqali onlayn yig‘ilish o‘tkazildi. Unda boshqarma bo‘lim boshliqlari va mutaxassislari, xalq ta’limi bo‘limi mudirlari ishtirok etdi.
Yig‘ilishda boshqarma boshlig‘i Saidahmad Usmonov maktab bitiruvchilarining oliy ta’lim muassasalariga o‘qishga hujjat topshirish holatini tanqidiy muhokama qildi.
Ta’kidlanishicha, 2019-2020 o‘quv yilida viloyat maktablarining 11-sinfini 53583 nafar o‘quvchi bitirdi. O‘tkazilgan so‘rovnomalar natijasiga ko‘ra, 46552 nafar bitiruvchi OTMda o‘qish, 2612 nafari esa kasb-hunar maktablari va texnikumlarda o‘qish, shuningdek, 4414 nafari ishga joylashish istagini bildirgan.
— 2020 yil 16 iyul holatiga ko‘ra, OTMda o‘qish istagini bildirgan bitiruvchilarimizdan 34869 nafari hujjat topshirgan, — dedi boshqarma boshlig‘ining birinchi o‘rinbosari Q.Saidov. — Bu ularning 65 foizini tashkil qiladi. Agar joriy yilning 20 iyul kuni OTMga hujjat topshirish yakunlanishini inobatga olsak, qolgan 35 foiz bitiruvchimiz qachon hujjat topshirishga ulguradi, degan savol tug‘iladi. Vaholanki, ushbu yo‘nalishda keng imkoniyat yaratilib, hujjatlarni qabul qilishning onlayn shakli — oson va ortiqcha ovoragarchiliklarsiz topshirish amaliyoti joriy qilingan. Bunga xalq ta’limi bo‘limi mudirlari qanday izoh bildiradi?
Achinarlisi, Bulung‘ur tumani maktablarining OTMda o‘qimoqchi bo‘lgan 2688 nafar bitiruvchisidan 780 nafari, payariqlik 3562 nafar maktab bitiruvchisidan 1337 nafari hujjat topshirgan, xolos. Samarqand va Kattaqo‘rg‘on shaharlari, Qo‘shrabot, Past Darg‘om tumanlarida ham bu boradagi holat qoniqarli emas.
Onlayn yig‘ilishda Bulung‘ur va Payariq tumanlari xalq ta’limi bo‘limi mudirlari qat’iy ogohlantirildi.
Umumta’lim muassasalarining yangi o‘quv yiliga tayyorgarligi, ta’lim sifati va samaradorligini oshirishga doir masalalar muhokama etilib, aniq vazifalar belgilab olindi.
Shuningdek, umumta’lim muassasalari hududida eski va foydalanishga yaroqsiz deb topilib, viloyat hokimining tegishli qaroriga asosan buzilishi lozim bo‘lgan binolarni buzish ayrim tumanlarda paysalga solib kelinayotgani ta’kidlandi. Ushbu masalada zudlik bilan amalga oshirilishi lozim bo‘lgan vazifalarga to‘xtalib o‘tildi.
O‘quvchilarni kasb-hunar maktablariga tavsiya asosida jalb qilish, bu boradagi muhim masalalar yuzasidan kasbiy ta’limni rivojlantirish va muvofiqlashtirish viloyat hududiy boshqarmasi boshlig‘i Aziz Nasimov o‘zining takliflarini bildirdi.
Darhaqiqat, 2019-2020 o‘quv yilida viloyatdagi umumta’lim maktablarining 9-sinfini 55598 nafar o‘quvchi bitirdi. Ularning 2454 nafari akademik litseylarda, 1425 nafari esa kasb-hunar maktablarida o‘qishni davom ettirish istagini bildirgan. Qolganlari esa maktabda o‘qishini davom ettiradi.
Samarqand viloyati xalq ta’limi boshqarmasi axborot xizmati.
