Ўзбекистонда илк бор шахмат бўйича онлайн чемпионат ўтказилмоқда
Шахмат бўйича ҳаваскорлар ўртасида 11 майдан 20 майгача “Уйда қол ва ғалаба қозон!” шиори остида “O'zbekiston Online chempionati” мусобақаси ўтказилмоқда.
Мусобақа Ўзбекистон Республикаси Жисмоний тарбия ва спорт вазирлигининг спорт ва оммавий жисмоний тарбия тадбирларини ўтказиш календарь режасига мувофиқ ҳамда Ўзбекистон электрон компьютер спорти федерацияси ташаббуси билан ташкил этилмоқда.
Республика бўйлаб интернет тармоғи орқали онлайн тизимида ўтказиладиган шахмат мусобақасининг мукофот жамғармаси 30 миллион сўм этиб белгиланди.
Муҳими, иштирокчиларнинг ёши чегараланмаган. Қатнашувчилар www.chess.com сайтига кириб, рўйхатдан ўтишлари мумкин. Ўйин жараёнлари ва қизиқарли шарҳларни Ўзбекистон Киберспорт федерациясининг Youtubeʼдаги расмий канали орқали томоша қилинг.
Жами 10 турнир ўтказилиб, 10 нафар ғолиб аниқланади. Пул мукофоти ғолибнинг банк картасига ўтказилади.
Ўйинлар ўн кун давомида Тошкент вақти билан 20:30 да ўтказилади. Ғолиб икки марта қатнашиш ҳуқуқига эга эмас.
Онлайн мусобақани ўтказишдан мақсад аҳолининг бўш вақтини мазмунли ўтказиш, карантин даврида спорт ҳамда кўнгилочар стратегияларни тарғиб қилиш, шунингдек, шахматнинг интеллектуал спорт тури сифатида янада оммавийлигини оширишдан иборат.
