O‘zbekistonda ilk bor shaxmat bo‘yicha onlayn chempionat o‘tkazilmoqda
Shaxmat bo‘yicha havaskorlar o‘rtasida 11 maydan 20 maygacha “Uyda qol va g‘alaba qozon!” shiori ostida “O‘zbekiston Online chempionati” musobaqasi o‘tkazilmoqda.
Musobaqa O‘zbekiston Respublikasi Jismoniy tarbiya va sport vazirligining sport va ommaviy jismoniy tarbiya tadbirlarini o‘tkazish kalendar rejasiga muvofiq hamda O‘zbekiston elektron kompyuter sporti federatsiyasi tashabbusi bilan tashkil etilmoqda.
Respublika bo‘ylab internet tarmog‘i orqali onlayn tizimida o‘tkaziladigan shaxmat musobaqasining mukofot jamg‘armasi 30 million so‘m etib belgilandi.
Muhimi, ishtirokchilarning yoshi chegaralanmagan. Qatnashuvchilar www.chess.com saytiga kirib, ro‘yxatdan o‘tishlari mumkin. O‘yin jarayonlari va qiziqarli sharhlarni O‘zbekiston Kibersport federatsiyasining Youtubeʼdagi rasmiy kanali orqali tomosha qiling.
Jami 10 turnir o‘tkazilib, 10 nafar g‘olib aniqlanadi. Pul mukofoti g‘olibning bank kartasiga o‘tkaziladi.
O‘yinlar o‘n kun davomida Toshkent vaqti bilan 20:30 da o‘tkaziladi. G‘olib ikki marta qatnashish huquqiga ega emas.
Onlayn musobaqani o‘tkazishdan maqsad aholining bo‘sh vaqtini mazmunli o‘tkazish, karantin davrida sport hamda ko‘ngilochar strategiyalarni targ‘ib qilish, shuningdek, shaxmatning intellektual sport turi sifatida yanada ommaviyligini oshirishdan iborat.
