Ўзбошимчалик билан қурилган иншоотларни расмийлаштириш учун “Эътироф” тизими жорий қилинади

Фуқароларга қурилиш учун ажратилган ер участкаларида барпо этилган, шу жумладан ўзбошимчалик билан қурилган уй ва иншоотларни расмийлаштириш ҳамда тизимли ҳисобга олиш бўйича янги тартиб жорий этилади.

Бу Вазирлар Маҳкамасининг тегишли қарори лойиҳасида назарда тутилган.

Ҳужжат “Ўзбошимчалик билан эгаллаб олинган ер участкаларига ҳамда уларда қурилган бинолар ва иншоотларга бўлган ҳуқуқларни эътироф этиш тўғрисида”ги Қонун ижросини таъминлаш мақсадида ишлаб чиқилган.

Қарор лойиҳасига мувофиқ:

- қонун доирасида ташкил этилган ишчи гуруҳлар томонидан барча турдаги кўчмас мулклар хатловдан ўтказилади, бунинг учун ер участкаси эгаларидан ариза талаб этилмайди;

- ажратилган (реализация қилинган) ер участкаларида ўзбошимчалик билан қурилган уй ва иншоотлар тўғрисидаги маълумотлар “Эътироф” ахборот тизимига киритилади;

- Кадастр агентлиги томонидан фойдаланишга рухсат берилган бино ва иншоотларга бўлган ҳуқуқлар белгиланган тартибда давлат рўйхатидан ўтказилади;

- хатлов жараёнида ўзбошимчалик билан қилинган қурилиш аниқланса, фуқароларга уй ва иншоотларни қандай тартибда расмийлаштириш бўйича тушунтириш ишлари олиб борилади.

Шунингдек, хатловдан сўнг уч ой муддат ичида қурилиш учун ажратилган ердаги ўзбошимчалик билан қурилган уйлар расмийлаштирилмаса, бу ҳақдаги маълумотлар Кадастр агентлиги томонидан Солиқ қўмитасига, Қурилиш ва уй-жой коммунал хўжалиги вазирлиги томонидан эса соҳадаги назорат инспекциясига юборилади.