Қийинчиликдан қуроқчилик қутқарди
Ёш бўлишимга қарамасдан ҳаёт қийинчилигининг кўпини кўриб қўйдим. Мактабни битириб, ўқишга ҳужжат топширдим, аммо 4 балл етмай қолди.
Тақдирга, қишлоқнинг ёзилмаган қоидаларига бўйсуниб, турмушга чиқишга мажбур бўлдим. Бошида ҳаётимиз яхши эди. Кейин жуда кўп муаммолар туғилди. Ҳаммасига чидаб, кўниб яшадим. Лекин барибир турмушим ўхшамади.
Ота уйимга қайтиб келдим. Аввалгидек бўлмас экан. Чиққан қиз чиғириқдан ташқари, дейди-ку. Ота-онамга оғирлигимни солгим келмасди.
Икки нафар ўғлим бор. Кўчага чиксак, бола-да, машинага қизиқади. Ҳар сафар ўйинчоқ оберинг, деганда олиб беролмаганимдан ич-ичимдан эзилганман. Ўзимдан хафа бўлиб кетганман. Ишсизлик, ҳам ота, ҳам она бўлиб фарзандларни тарбиялаш ва бошқа ҳаётий қийинчиликлар...
Кунларнинг бирида, таксида хаёл суриб, ҳеч нарсага эътибор бермай кетаётган эканман. Ёнимда ўтирган аёл, нега бу ҳолатда эканлигимни сўраган. Ҳаммадан сир сақлаб келаётган муаммоларимни, бор дардимни шу опага айтиб берганман. У киши исми Раҳима эканлигини, қуроқчилик билан шуғулланишини, истасам, мени шогирдликка олишини айтиб, уйига таклиф қилди.
Бир куни вақт ажратиб уларникига бордим. Опа мени қуроқ кашталар билан безатилган хонада кутиб олди. Бу ердаги манзарани кўриб, бир муддатга бўлсаям бошимда айланиб ётган муаммоларни унутгандай бўлдим. Шогирдликка тушишга қарор қилдим.
Бугун Раҳима опанинг қўлигул шогирдлари сафидан жой эгалладим.
Менинг қаҳрамоним, бу - устозим Раҳима опам. Ҳар тарафлама, ҳам руҳий, ҳам моддий қийинчиликлардан чиқиб кетишимга сабабчи бўлди.
Қуроқчи ҳунарманд сифатида турли кўргазма ва фестивалларда қатнашяпман. Қуроқ кашта маҳсулотлари бир пайтлар турмушга чиқаётган ҳар бир қизнинг сепига солинган. Бугунги кунда ҳам миллийлигимизни қадрлайдиганлар йўқ эмас. Асосан, мен тикаётган маҳсулотларнинг харидорлари хорижликлар. Улар қўл меҳнатини жуда қадрлайди.
Қуроқчилик билан шиғулланиб, кам бўлмадим. Ойига ўртача 4-5 миллион сўм даромад топаман. Шукрки, бугун фарзандларим истаган ўйинчоқни олиб беришга қурбим етяпти. Энг яхши боғчаларнинг бирида тарбияланяпти.
Келгусида устозим каби маҳоратли ҳунарманд бўлиб, миллий қуроқчилигимиз донғини бутун дунёга ёйиш учун муносиб қўшишни мақсад қилганман.
Дурдона Файзуллаева,
Иштихон тумани.
