Рухсатсиз иморатга мулк ҳуқуқи қандай расмийлаштирилади?

“Жисмоний ва юридик шахсларнинг ўзбошимчалик билан қурилган тураржойлар ва уларга нисбатан мулк ҳуқуқини эътироф этиш бўйича Президент фармонидан келиб чиқиб, жисмоний шахслар ўзига тегишли бўлмаган ер участкасида қурган тураржой учун мулк ҳуқуқи суд томонидан эътироф этилади. Лекин иморат қурилган ер участкасига маълум шартлар асосида белгиланган тартибда мулк ҳуқуқи берилади. 
Бунинг учун ҳудудларда кадастр идораси, экология ва бошқа манфаатдор ташкилотларнинг вакилларидан иборат махсус комиссия ташкил этилиб, фуқаро ўзбошимчалик билан қурган иморатига мулк ҳуқуқини эътироф этиш учун ўша комиссияга мурожаат қилади. 
Комиссия фуқароларнинг мурожаатларини кўриб чиқиб, ўзбошимчалик билан қурилган иморатларни жойига чиқиб ўрганади ва зарур ҳужжатларни расмийлаштириб, туман (шаҳар) ҳокимига ўша объектга мулк ҳуқуқини эътироф этиш учун таклиф киритади. 

Фармонга асосан, мулк ҳуқуқини эътироф этиш ушбу объектга доимий ва ошкора эгалик қилинганда, иморат қурилган ер участкаси қонунга мувофиқ тураржой қуриш учун ажратилиши мумкин бўлмаган майдонда жойлашмаган бўлиши керак. 
Шунингдек, қурилган объект шаҳарсозлик талабларига мувофиқ бўлиши, фуқароларнинг ҳаёти ва саломатлигига хавф солмаслиги лозим. Ўзбошимчалик билан қурилган иморатга мулк ҳуқуқи эътироф этилиши билан бирга, фуқарога ушбу ер участкасини умрбод мерос қилиб қолдириш ҳуқуқи ҳам берилади. 
Ўзбошимчалик билан қурилган иморатга эгалик ҳуқуқини эътироф этишда республикамизда амалда бўлган энг кам ойлик иш ҳақининг беш баробари миқдорида тўлов ундирилиб, ушбу акция 2019 йил 1 майгача давом этиши белгиланган”. 

“Зарафшон” газетасининг 50-сонида мавзуга доир қуйидаги саволларга жавоб топасиз:
-    Фармонда ўзбошимчалик билан эгаллаб олинган ер участкаларининг ортиқча қисми захирага қайтарилиши айтилган. Бунда истиқомат қилиш учун қанча ер майдони ҳисобланади ва ортиқчаси қай тартибда қайтариб олинади? 
-    Ўзбошимчалик билан қурилган иморатга мулк ҳуқуқи эътироф этилиши учун фуқаролардан қандай ҳужжат талаб қилинади? 

Ўктам ХУДОЙБЕРДИЕВ
суҳбатлашди.