Самарқанд шаҳрида "Дарахт эк - ҳаётингни яшнат!" шиори остида экологик марафон бўлди
Самарқанд вилоятининг шаҳар ва туманларида, кўча ва хиёбонларда манзарали дарахт кўчатларини экиш, уларни парвариш қилиш маданиятини шакллантириш мақсадида “Дарахт эк! - Ҳаётингни яшнат!“ шиори остида ўтказилаётган акция доирасида Самарқанд шаҳрида экологик марафон бўлиб ўтди.
Самарқанд вилояти уй-жой коммунал хизмат кўрсатиш бошқармаси, Ўзбекистон ёшлар иттифоқи вилоят кенгаши ҳамда “Овози Самарқанд” газетаси ҳамкорлигида ташкил этилган юриш марафони иштирокчилари Кўксарой майдонидан Университет хиёбони ва Хожа Аҳрори Валий кўчалари орқали Нодир Девонбеги мадрасасигача бўлган асосий кўчаларда ҳаракат қилди.
Шаҳримизни бугунги қиёфасини яшнатиб турган манзарали дарахтларни асраб-авайлаш, янги кўчат ва гулларни экиш, экологик маданиятни юксалтириш орқали атроф-муҳитни тоза сақлаш мақсадида ташкил этилган тадбирда меҳнат фахрийлари, давлат ва жамоат ташкилотлари ходимлари, фаол ёшлар ва кенг жамоатчилик вакиллари иштирок этди.
