Samarqand xalqaro aeroportida "Nikolay kumush tangasi" ushlab qolindi

Bugun Samarqand xalqaro aeroporti orqali “Samarqand-Vnukovo” aviareysi bilan uchib ketayotgan shaxsga tegishli qo‘l yuklar bojxona xodimlari tomonidan ko‘zdan kechirilganda, yo‘lovchi bojxona deklaratsiyasida yozib ko‘rsatilmagan hamda mamlakatimizdan olib chiqib ketish mumkin bo‘lmagan taxminiy qiymati 1,2 mln. so‘mlik, 1 dona 1896 yil zarb qilingan "Nikolay kumush tangasi" borligi aniqlandi.

Holat yuzasidan bojxona xodimlari tomonidan ma’muriy huquqbuzarlik to‘g‘risidagi bayonnoma rasmiylashtirilgan.

Endilikda ushbu madaniy boylik “Samarqand” davlat muzey qo‘riqxonasiga topshiriladi.

Eslatib o‘tamiz, “Madaniy boyliklarning olib chiqilishi va olib kirilishi to‘g‘risida”gi qonun hamda “Madaniy boyliklarni olib chiqilishi va olib kirilishi to‘g‘risida”gi Nizom talablariga muvofiq, ellik yil muqaddam va undan ham oldin yaratilgan madaniy boyliklarni O‘zbekiston hududidan olib chiqish mumkin emas.