Самарқандда ички ишлар идоралари ходимлари пора олмайди
Соҳа ходимлари коррупцияга қарши муросасиз бўлиши учун тизим яратилган.
Коррупция – ҳар қандай жамиятни таназзулга юз тутишига асосий сабабчи бўлиши янгилик эмас. Шу сабаб давлатимиз раҳбарининг ташаббуси билан мамлакатимизда коррупцияга қарши курашнинг янги тизими яратилди.
Биргина мисол, бугун пора олган билан уни берган ҳам теппа-тенг жавобгар саналади. Ваҳоланки, бор-йўғи 8-10 йил аввал пора олган шахс – айбдор, яъни жиноятчи саналиб, порани берган кимса эса жабрланувчи ҳисобланиб келган.
Минг афсуски, иллатни йўқ қилишга қаратилган бу каби чора-тадбирларга қарамай қайсидир ишини битириб олиш учун очиқдан-очиқ пора таклиф қилаётган юртдошларимиз ҳали-ҳамон учраб турибди.
Хусусан, яқинда Пахтачи туманида яшовчи 1976 йилда туғилган фуқаронинг яшаш уйида ўтказилган “Тинтув” тергов ҳаракати давомида, 2 дона “бита” ва 1 дона “кастет” совуқ қурол ҳамда томорқа ер майдонида “марихуана” гиёҳвандлик моддаларини экиб парвариш қилинааётганлиги аниқланган.
Ҳолат холислар иштирокида ҳужжатлаштирилгач, фуқаро туман ИИБ ходимнинг олдига келиб тўпланган ҳужжатларни тергов органларига ўтказмасдан, ҳеч қандай чора кўрмаслик эвазига 20 миллион сўм пул таклиф қилган.
ИИБ ходими фуқарога унинг ҳаракатлари ноқонуний эканлиги бир неча бор тушунтирилса-да, 3 минг доллар пул таклиф қилган. Ҳолат юзасидан тезкор тадбир ўтказилиб, фуқаро айтилган пул – порани берган вақтида тадбир иштирокчилари томонидан далилий ашёлар билан ушланган.
Шу ўринда қайд этиш лозимки, Ички ишлар вазирининг 2022 йил 3 мартдаги “Ички ишлар органларида коррупцияга қарши муросасиз муносабатда бўлиш муҳитини яратиш ҳамда коррупциявий омилларни кескин камайтириш чора-тадбирлари тўғрисида”ги буйруғи ҳамда вазир ўринбосарининг жори йил 26 майдаги фармойиши асосида июнь ойининг биринчи ўн кунлиги вилоятнинг барча ички ишлар органларида “Коррупцияга қарши курашиш долзарб ўн кунлиги” деб эълон қилинган.
Жорий йилнинг ўтган даврида вилоят ҳудудида 57 та коррупцияга оид жиноятлар аниқланди. Шундан 9 таси пора олиш, 47 таси пора бериш ҳамда 1 таси воситачилик қилиш билан боғлиқ жиноятлардир.
Соҳаларга кесимида таҳлил қилинганда қайд қилинган коррупцияга оид жиноятларнинг 49 таси ижтимоий соҳа йўналиши, 8 таси иқтисодий соҳа йўналиши (1 таси - экология, 1 таси солиқ, 2 таси коммунал хизмат, 4 таси бошқа иқтисодий соҳалар) бўйича содир этилган.
Қайд этиш лозимки, ички ишлар органлари ходимларида фуқаролар томонидан хизмат фаолияти билан боғлиқ пора таклиф қилиш ҳолатларига муросасиз муносабатни шакллантиришга алоҳида эътибор қаратилмоқда. Жумладан, пора таклиф қилинаётгани ҳақида белгиланган тартибда ахборот берган ходимлар мукофотланмоқда. Бу борада жорий йилнинг шу даврида 16 ҳолатда пора бериш жиноятлари аниқланиб, қонун устуворлиги таъминланди. Қонун устуворлигини таъминлаган ходимларга 60 миллион сўм миқдорида пул маблағи берилди.
Фаррух Нурмуродов,
вилоят ИИБ маънавий-маърифий ишлар ва кадрлар билан таъминлаш хизмати катта инспектори, лейтенант.
