Самарқандда 4 гектар ерни 55 минг долларга сотмоқчи бўлган фирибгар ушланди

Фуқаро С.Х. ва С.А.ларнинг Самарқанд вилояти ИИБ ер ресурслари талон-торож қилинишига қарши курашиш бўлинмасига қилган мурожаатига асосан вилоят прокуратураси ҳамда бошқа ҳуқуқни муҳофаза қилувчи орган ходимлари билан ҳамкорликда тезкор тадбир ўтказилди.

Тадбирда фуқаро М.А. Самарқанд тумани Миронқул маҳалласи ҳудудидан туман ҳокимининг қарорига асосан “A.S.” МЧЖга интенсив токзор барпо этиш учун ажратилган жами 21,3 гектар ер майдонларидан 4 гектар қисмини 55 минг АҚШ доллари эвазига сотишга келишиб, келишилган пулдан 30 минг АҚШ долларини ариза берган фуқародан фирибгарлик йўли билан олаётган вақтида ашёвий далиллар билан ушланган.

Бош прокуратура ахборот хизмати хабарига кўра, мазкур ҳолат юзасидан Бош прокуратура ҳузуридаги Департаментнинг Самарқанд тумани бўлими томонидан М.А.га нисбатан Жиноят кодексининг 168-моддаси 4-қисми “а” банди билан жиноят иши қўзғатилиб, тергов ҳаракатлари олиб борилмоқда.