Самарқандда муддатли ҳарбий хизматчилар учун тест синовлари бошланди
Самарқанд шаҳрида муддатли ҳарбий хизматни ўтаётган аскарлар учун Қуролли Кучлар кичик мутахассисларни тайёрлаш марказида тест синовлари ўтказилмоқда.
Тест синовларида юқори балл тўплаган муддатли ҳарбий хизматчилар олий таълим муассасаларига ўқишга киришда қўшимча балл берадиган ҳарбий қисм командирининг имтиёзли тавсияномаларини қўлга киритади. Тест синовларини ўтказишда шафофликни таъминлашга алоҳида эътибор қаратилган. Бунинг учун аудиториялар камера билан жиҳозланган, жараён назорат гуруҳи аъзолари томонидан кузатиб борилмоқда.
Муддатли ҳарбий хизматчилар учун мўлжалланган тест саволларининг умумий сони 100 та бўлиб, уларнинг 40 таси жанговар тайёргарлик, 20 таси маънавий-маърифий тайёргарлик, 10 таси математика, 10 таси физика фанлари бўйича тузилган. Шунингдек, қолган 20 таси мантиқий тест саволларидан иборат.
Ҳар бир тўғри жавоб учун жанговар тайёргарлик бўйича 1,2 балл, маънавий-маърифий тайёргарлик бўйича 1,1 балл, математика бўйича 1 балл, физика бўйича 1 балл, мантиқий саволлар бўйича 1 балл берилади. Максимал 110 балл олиш мумкин. Тест синовларини ўтказишнинг умумий вақти 3 соатни ташкил этади. Бунда, тест синови учун 2 соат 30 дақиқа, жавоблар варақасини тўлдириш учун 30 дақиқа ажратилади.
– Бугун имтиёзли тавсиянома олиш учун тест топширдим, – дейди қашқадарёлик аскар Жавоҳир Комилов. – Бунда мактаб ва коллежда олган билимларимиз, қолаверса, ҳарбий хизмат давомида ўқиб ўрганганларимиз асқотди. Синовлардан муваффақиятли ўтиб, юқори балл тўплаб, ҳарбий қисм командирининг имтиёзли тавсияномасини қўлга киритсам, олий ўқув юртига ўқишга топширишни мақсад қилганман.
Илк кунги тест синовларида 240 нафар муддатли ҳарбий хизматчи иштирок этди. Белгиланган график асосида тест топшириш вилоятнинг бошқа ҳудудларида ҳам 3 февралга қадар босқичма-босқич ўтказилади.
