Сиз яхши раҳбармисиз? (Ўзига бино қўйганлар ўқимасин)

Албатта, гарчи айрим қусурларини пинҳона тан олса-да, ҳеч қайси раҳбар ўзини ёмон ёки вазифамга номуносибман, демайди. Аммо ўз фаолиятига четдан қараб қўйиш фойдадан холи эмас.

Ижтимоий тармоқлардаги сўровлар натижасига кўра яхши раҳбар қуйидагиларга эга бўлмоғи лозим:

- ҳалол, покиза, ўқиб олинган мутахассислик ва дипломга;

- маслаҳат бера оладиган, ўзи ҳурмат қиладиган устозга;

- борига шукур қилиш ва қаноатга;

- кундалик нашр ва ижтимоий тармоқларни кузатиб бориш, вақт топганда китоб ўқиш кўникмасига;

- биров ҳақида маълумот берувчи ғийбатчиларни эшитмаслик хислатига;

- ўзини бўлар-бўлмасга мақтовга йўл қўймасликка;

- эътирозлар кўпайгач ёки ёши ўтиб қолганда лавозимни тарк эта олиш иродаси.

Қуйидагилар раҳбар фаолиятининг асосий тамойиллари ҳисобланади:

- режа туза билиш, ҳар бир ходимнинг функционал вазифасини белгилаб бериш;

- режа ижросини доимо назорат қилиш;

- ўзига муносиб шогирд, ўринбосар тайёрлаш;

- ўз соҳаси бўлинмаларидаги вазиятдан хабардор бўлиш.

- ходимларга мажлисдаги нутқи, маслаҳат эмас, балки шахсий ибрати орқали сабоқ бериш;

- таниш-билишчилик, қариндош-уруғчиликка берилмаслик;

- жамоада ошкораликни таъминлаш.

Хўш, бир ўйлаб, таҳлил қилиб кўрингчи, сизнинг фаолиятингизда ушбу тамойил, принцип ва хислатлар борми? Бор бўлса – кўп яшанг, ишни қўрқмасдан давом эттиринг. Акс ҳолда… бошқа жойдан иш топинг.