Тириклай дафн этилган аёл уч кундан сўнг тирик ҳолда қабрдан чиқариб олинди

Хитойнинг Шэнси вилоятида тезкор хизмат ходимлари ўз ўғли томонидан дафн этилган 79 ёшли аёлни қабрдан қутқариб олишди. Бу ҳақда Sputnik.ru нашри хабар берди.

Воқеа 5 май куни, аёлнинг келини полицияга мурожаат қилганидан сўнг маълум бўлди. Келиннинг сўзларига кўра, унинг турмуш ўртоғи фалаж бўлиб қолган онасини аравага солиб номаълум томон олиб кетган. Маълум вақт ўтгач, эркак уйга ёлғиз ўзи қайтиб келган.

Эркак хотинига онасини қариндошлариникига ташлаб келганини айтган. Бироқ аёл эри ёлғон гапираётганини сезиб қолган ва ҳуқуқни муҳофаза қилиш идорасига мурожаат қилган.

Олиб борилган суриштирув натижаларига кўра, ўғил онасини қабристондаги бўш қабрларнинг бирига жойлаб, кўмиб ташлагани аниқланган.

79 ёшли аёл уч кеча-кундуз қабр ичида қолиб кетган. Қидирув-суриштирув ишлари олиб борилаётган вақтда полиция ходимлари қабр ичидан чиқаётган овозларни эшитиб қолишган. Шундан сўнг аёл зудлик билан қутқариб олинган ва касалхонага юборилган.

Ўғилга эса узоқ муддатли қамоқ жазоси хавф солмоқда.