Тўрт оёқли чақалоқнинг икки оёғи жарроҳлик йўли билан олиб ташланди

Яқинда Сурхондарёда тўрт оёқ билан дунёга келган гўдак Самарқанд вилоят болалар кўп тармоқли тиббиёт марказига олиб келинди. Чақалоқ бир нечта туғма нуқсонлар билан туғилган.

Марказ шифокорлари мураккаб жарроҳлик амалиётини ўтказиб, қўшимча икки оёқни олиб ташлашди.
Операция муваффақиятли якунланди. Айни пайтда гўдак шифокорлар назорати остида бўлиб, унинг соғлиғини тиклаш учун яна бир нечта жарроҳлик амалиётлари режалаштирилган.

- Афсуски, қариндошлар ўртасидаги никоҳлар, ота-оналарнинг соғлом турмуш тарзига амал қилмаслиги, скрининг назоратидан ўз вақтида ўтмаслиги турли ногиронлик ҳолатларига сабаб бўлмоқда, - дейди марказ кардиожарроҳи Нисо Турдиева. – Гарчи кейинги йилларда ҳомиладор аёлларни скринингга қамраб олиниш фоизи кўпаяяётган бўлса-да, аммо скрининг натижаларига эътиборсиз қараш ҳолатлари ҳам кўп. Натижада ногиронлик билан туғилиш ҳамон учрамоқда.
Юқоридаги каби чақалоқ туғилиши дунё тиббиёт амалиётида камдан-кам учрайдиган ҳолат.