“Тошкент-Самарқанд" йўли сутканинг ёруғ вақтида транспорт воситаларининг ҳаракатланиши учун очилди
Ҳурматли Сирдарё вилояти ҳудудидан транзит тартибида ҳаракатланиб ўтадиган ҳайдовчилар!
Хабарингиз бор, 2020 йил 1 май куни Сирдарё вилоятидаги “Сардоба” сув омбори тўғонида юзага келган фавқулодда ҳодиса оқибатида Сардоба, Мирзаобод ва Оқолтин туманлари ҳудудларидаги аҳоли яшаш пунктлари, сув тошқини йўналишидаги дала майдонларидаги экинларга ҳам жиддий талафот етди.
Шу билан бир қаторда ушбу сув тошқини оқибатида юқоридаги ҳудудлардаги халқаро, давлат ва маҳаллий автомобиль йўллари, йўл кўприкларига ҳам жиддий зарар етиб, транспорт воситаларини ҳаракатланиши чекланди.
Тегишли ташкилотлар томонидан олиб борилган қурилиш-таъмирлаш, монтаж ишлари давомида Оқолтин тумани ҳудудидан ўтган М-34 автомобиль йўли билан Гулистон йўналиши бўйича ўтган М-34 йўлини боғлаб турувчи А-373 халқаро аҳамиятдаги автомобиль йўлининг 37-километрдан 0 километргача бўлган ҳудудининг "Тошкент-Самарқанд" йўналиши 2020 йил 13 июнь кунидан транспорт воситаларининг сутканинг ёруғ вақтида ҳаракатланиши учун очилди.
Ҳозирги кунда ҳам тегишли ташкилотлар томонидан керакли махсус транспорт воситалари жалб этилган ҳолда ушбу автомобиль йўли ҳамда кўприкларда таъмирлаш ишлари жадал суръатларда амалга оширилмоқда.
Юқоридагиларни инобатга олиб, вилоят ҳудудидан бошқа вилоятларга транзит тартибида ҳаракатланаётган ҳайдовчилар ва фуқароларга "Тошкент-Самарқанд" йўналиши бўйича транспорт воситаларида ҳаракатланиш вақтида М-34 автомобиль йўлининг 103-километридан А-373 автомобиль йўлидан фойдаланган ҳолда ҳаракатланиб ўтишлари мумкинлиги, лекин йўлнинг очилган қисмидаги йўл ўтказгич кўприкларда таъмирлаш ишлари олиб борилаётганлиги ҳамда тирбандликларни олдини олиш мақсадида сутканинг қоронғу вақтида транспорт воситалари М-34 автомобиль йўлининг 103-километр "Тошкент-Душанбе" йўналиши бўйича ҳаракатланишда давом этишлари мумкинлигини билдирамиз.
Шу билан бирга, Сирдарё вилоятидан транзит тарзда Жиззах йўналишидан Тошкент ва водий вилоятларга йўл олган транспорт воситалари ҳайдовчилари А-373 автомобиль йўлининг 17-37 километрларида таъмирлаш ишлари кетаётганлиги сабабли Мирзаобод тумани ҳудудидан ўтган 4Р-18А автомобиль йўли орқали Гулистон шаҳар йўналиши томон ҳаракатланиб, М-34 автомобиль йўлининг 119 километридаги чорраҳага чиқиб, Тошкент ва водий вилоятлари томон йўналишга чиқиб кетишлари мумкин.
Юқоридагиларни инобатга олиб, ҳайдовчилардан йўлларнинг ушбу қисмидан ҳаракатланаётган вақтида йўл ҳаракати қоидалари ҳамда тартибга солувчининг ишораларига амал қилган ҳолда транспорт воситаларини бошқаришларини сўраб қоламиз.
Йўлингиз бехатар бўлсин!
Ўзбекистон Республикаси ИИВ ЙҲХББ ахборот хизмати.