Трамп шатдаун сабабли Оқ уй ходимларининг учдан бир қисмини ишдан озод қилади

АҚШ президенти Дональд Трамп маъмурияти ҳукуматдаги шатдаун (инглизчадан — тўхтатиш, ўчириш, ёпиш) шароитида ўз ходимларининг тахминан учдан бир қисмини маошсиз таътилга юборишни режалаштирмоқда. Бу ҳақда пайшанба куни Оқ уй сайтида эълон қилинган режада айтилган.
Ҳужжатга кўра, вақтинчалик ишга чиқмайдиганлар сони 1733 ходимдан 554 нафарни ташкил қилади. Қолганлари эса одатий тартибда ишлашда давом этади.
Шу билан бирга, яқинда ташкил этилган Федерал ҳукумат самарадорлигини ошириш агентлиги (DOGE) қисқартириш ёки ишдан бўшатишга дуч келмайди. Оқ уйнинг Маъмурий-бюджет бошқармасига тегишли 530 ходимдан 437 нафари ишда қолиши кутилмоқда. Бу ҳозирча маъмуриятнинг бошқа бўлинмаларидан кўра кўпроқдир.
Бундан аввал хабар қилинганидек, Оқ уй шатдаун муносабати билан қисқартиришлар ўтказиладиган идоралар рўйхатини тузган. Манбаларга кўра, айрим агентликлар турли хиллик, тенглик ва инклюзивлик сиёсати туфайли рўйхатга кирган. Аммо асосий сабаб — бу ташкилотларнинг Трамп устувор йўналишларига мос келмаслиги.