Ижтимоий тармоқларда Пайариқ туманида бир аёл бор-йўғи битта уколдан вафот этгани ҳақидаги хабарлар тарқалди

1992 йилда туғилган аёл, қариндошларининг айтишича, шу йилнинг январь ойида даволаниш учун тумандаги хусусий шифохоналардан бирига мурожаат қилган.

Гинекологик хасталикдан даволаниш учун қатнаб муолажа олаётганининг учинчи куни шу ҳол рўй берган. Врач беморнинг қариндошларига “наркоздан кейин шундай бўлди”, деган фикрни айтади. Аммо қариндошлари аёл наркоз қиладиган муолажа олмаётганини таъкидлашмоқда. Клиникада аёлнинг аҳволи оғирлашгач, шифокор бошчилигида уни туман тиббиёт бирлашмасига қарашли 1-сон Челак шифохонасига олиб боришади.

Пайариқ туман тиббиёт бирлашмаси масъуллари аёл шифохонага биологик ўлим ҳолатида келтирилганини айтишмоқда.

Вилоят соғлиқни сақлаш бошқармаси масъуллари марҳума даволанган хусусий клиника хусусий шифохоналар реестрига киритилмаганлигини, махсус лицензияга эга эмаслигини таъкидлашди. Ушбу клиникада беморга тиббий хизмат кўрсатган шифокор эса 2021 йилдан буён давлат тиббиёт муассасаларида фаолият кўрсатмаган.
Вилоят прокуратурасининг маълум қилишича, Пайариқ туманида 1992 йилда туғилган аёлнинг вафот этганлигини юзасидан прокуратура томонидан терговга қадар текширув ишлари олиб борилмоқда. Марҳуманинг ўлим сабабларини аниқлаш мақсадида суд тиббиёт экспертизаси тайинланган.