Ургутлик ўқувчи дунёнинг ТОП-200 университетларига муддатидан олдин ўқишга қабул қилинди

Ашраф Ўролбоев Ургут туманидаги 103-сонли умумтаълим мактабини шу йил битиради. У дунёнинг ТОП-200 университетларига муддатидан олдин ўқишга кирди.

Мактабнинг иқтидорли ва аълочи ўқувчиси АҚШнинг 5 та нуфузли университети - Arizona State University, Rowan University, Columbia College Chicago, Western New England University, DePaul Universityга муддатидан олдин Early admission асосида ўқишга қабул қилинди. Эътиборлиси, бу олий таълим муассасаларининг аксарияти QS World University Rankings халқаро рейтингида дунёнинг энг яхши 200 та университети қаторига киради.

Ушбу университетлардан Ашраф умумий ҳисобда 400 минг АҚШ долларидан ортиқ грант (стипендия) ютиб олди. Бу маблағ ўқув тўловлари, турар жой, китоблар ва бошқа зарур харажатларни тўлиқ қоплаш имконини беради.

Мактабни олтин медаль билан тугатаётган А.Ўролбоевнинг отаси Фарид Сафаров шифокор, онаси Ўғилой Қушназарова шу мактабда бошланғич таълим ўқитувчиси бўлиб ишлайди.

Ашраф мактабни 100 баллик тизимда аъло баҳолар билан якунлаяпти. У шахмат, таэквондо, ММА ва “Заковат” интеллектуал клуби каби турли тўгаракларда фаол иштирок этган. У, айниқса, нанотехнология, муҳандислик ва инновацион илмий ишланмалар соҳасига чуқур қизиқади.

- Бу ютуқ орзулар сари олиб борувчи йўлнинг бошланиши. Менинг энг катта илҳомим - келажакда инсоният ҳаётини яхшилашга хизмат қиладиган технологиялар яратиш, - дейди Ашраф.

У айни пайтда ўзига тақдим этилган таклифлар орасидан энг мос университетни танлаш учун ҳаракатда. Бу ютуқ нафақат Ашраф, балки бутун Ургут ёшлари учун мақсадлар сари ишонч бўлиб хизмат қилмоқда.

Абдулазиз Йўлдошев.