Вилоятнинг хорижий тилларни ўқитиш бўйича энг яхши мактаби аниқланди

Самарқанд шаҳридаги 47-умумтаълим мактабида “Хорижий тилларни ўқитиш бўйича энг яхши мактаб” танловининг вилоят босқичи ўтказилди. Унда танловнинг шаҳар ва туман босқичларида ғолибликни қўлга киритган 16 та мактаб жамоаси иштирок этди.

Унда мактаб ўқувчилари хорижий тилда ўқиш, ёзиш, тинглаш ва грамматика шартлари бўйича топшириқларни бажарди. Танловнинг вилоят босқичида 1-ўринни Оқдарё туманидаги 45-умумтаълим мактаби жамоаси қўлга киритди. 2-ўрин Иштихон туманидаги 1-ихтисослаштирилган давлат умумтаълим мактаби жамоасига, 3-ўрин эса Каттақўрғон шаҳридаги 14-ихтисослаштирилган давлат умумтаълим мактаби жамоасига насиб этди.

Танлов натижаларига кўра, 1-ўринни қўлга киритган мактаб ўқувчилар жамоасига 250 миллион, 2-ўринни қўлга киритган мактаб жамоасига 200 миллион, 3-ўринни қўлга киритган жамоага 150 миллион сўмлик ваучер ҳамда эсдалик совғалари топширилди, дея хабар бермоқда, вилоят мактабгача ва мактаб таълими бошқармаси.