Вучич президентликда қолди
Александр Вучич Сербиядаги президентлик сайловларида ғалаба қозонганини маълум қилди.
Овоз бериш куни охирида у 60 фоиздан кўпроқ овоз олганини маълум қилди. Амалдаги давлат раҳбари биринчи турда икки марта сайловда ғалаба қозонганини эслатди.
“Ўйлайманки, олдимизда ҳал қилиниши керак бўлган вазифалар кўп, лекин Сербия учун энг муҳими - минтақада яхши муносабатларга эга бўлиш, ЕИга йўлни давом эттириш, лекин анъанавий ҳамкорлар билан алоқаларни бузмасликдир”, деди Вучич.
Дастлабки маълумотларга кўра, унинг энг яқин рақиби, собиқ армия генерали Здравко Понош, тахминан 17 фоиз овоз олган. Сербия президентлиги учун жами саккиз номзод кураш олиб борди, уларнинг барчаси сайловда сезиларли фарқ билан ютқазди.
Вучич иккинчи президентлик муддати давомида Сербия ҳарбий бетарафликни сақлаб қолади ва ҳарбий иттифоқларга кирмайди, деб ваъда қилмоқда. Сиёсатчи манфаатлар мувозанатига «ўйин тикмоқчи». Сербия Россияга қарши санкцияларни қўллашдан ўзини тийган ягона Европа Иттифоқи номзоди бўлиб қолмоқда.
