Яна бошланди: АҚШ ва Эрон яна ўзаро зарба бермоқда

Яқин Шарқдаги вазият яна кескинлашмоқда. Исроил раҳбариятига Байрут жанубидаги ҳудудларни кенг кўламда бомбардимон қилишнинг олдини олиш ҳамда Эрон билан боғлиқ минтақавий келишувларни сақлаб қолишга интилаётган АҚШ яна эскалация марказида.

Кечаси АҚШ Қуролли кучлари Эроннинг кўплаб баллистик ракеталари ва дронларини йўқ қилганини маълум қилди. Баёнотга кўра, АҚШ томонидан йўқотишлар бўлмаган.

CENTCOM маълумотига кўра, Қувайт ва Баҳрайндаги ҳарбий базаларга йўналтирилган ракеталар нишонга етиб бормаган ёки ҳаво мудофааси тизимлари томонидан уриб туширилган.
АҚШ Эроннинг Ҳурмўз бўғозидаги оролларидан бирига зарба бериб, буни фуқаролик кемаларига, шунингдек Қувайт ва Баҳрайн ҳудудларига қарши йўналтирилган дронлар ҳамда баллистик ракеталар ҳужумларига жавоб чораси деб атади.

Шу тариқа, Вашингтон ва Теҳрон ўртасида дипломатик алоқалар сақланиб қолаётган бўлса-да, ҳарбий майдондаги қарама-қаршилик, қуролли тўқнашув яна авж олаётгани кузатилмоқда.
Хусусан, Ливандаги кескинлашув АҚШнинг Эрон билан олиб бораётган музокараларига салбий таъсир кўрсатди. Бир неча кун аввал Эрон Исроилнинг Ливанга берган зарбаларга норозилик сифатида АҚШ билан алоқаларни тўхтатганини маълум қилди. Бироқ АҚШ президенти Дональд Трампнинг таъкидлашича, Вашингтон бу ҳақда расман хабардор қилинмаган.

Бундан дарғазаб Трамп Исроил бош вазири Биньямин Нетаньяху билан телефон орқали «жиддий суҳбатлардан бири»ни ўтказди. Суҳбат чоғида Трамп жаҳл билан Нетаньяхуга танбеҳ берган.
Айни пайтда сиёсий мулоқотлар давом этмоқда. Кеча АҚШ воситачилигида Ливан ва Исроил делегациялари ўртасидаги навбатдаги музокаралар босқичи якунланди. Томонлар мулоқотни бугун Вашингтонда, АҚШ Давлат департаментида давом эттириши кутилмоқда.