Январь ойи пенсиялари қачон тўланади?
Бугунги кунда пенсия маблағлари ҳар ойнинг 5-санасига қадар пенсионерларнинг банк пластик карталарига юклаб берилаётган бўлса, нақд шаклда пенсия олувчиларга ҳар ойнинг 4-27 санасигача пенсиялари етказиб берилмоқда.
Маълумки, жорий йилнинг 31 декабрь – 4 январь кунлари “Янги йил” байрами муносабати билан юртимизда барча фуқаролар учун дам олиш кунлари деб эълон қилинди. Табиийки, ҳозирда пенсионерларда январь ойи пенсияси қачон берилади каби саволлар туғилмоқда. Мазкур масала юзасидан Пенсия жамғармаси қуйидагиларни маълум қилади:
Пенсия жамғармаси томонидан молиялаштириладиган маблағлар ҳар йил учун тасдиқланадиган “Ўзбекистон Республикасининг Давлат бюджети тўғрисида”ги Қонуни билан кўзда тутилади.
“2026 йил учун Ўзбекистон Республикаси Давлат бюджети тўғрисида”ги Қонун (https://lex.uz/pdfs/-7949060) билан Пенсия жамғармасининг 2026 йил учун ҳаражатлари тасдиқланганлигини инобатга олиб, январь ойи пластик карталари орқали олувчи фуқароларнинг пенсия тўловлари 5 январдан бошлаб юкланади.
Шу муносабат билан, 2026 йилнинг 5 январь кунидан бошлаб Пенсия жамғармаси томонидан пенсия тўловлари учун маблағлар пенсия етказиб берувчи ташкилотларга молиялаштириб берилиши бошланади.
Бунда январь ойи пенсия тўловлари 2026 йилнинг 5 январь куни банк пластик карталарга юклаб берилиши ҳамда 27 январь санасига қадар нақд шаклда пенсия олувчиларга Халқ банкининг сайёр кассалари томонидан кунлик график асосида маҳалла фуқаролар йиғинлари орқали ёки фуқароларнинг яшаш манзилига етказиб берилади.
Фуқаролар пенсиялар бўйича саволлар юзага келган тақдирда Пенсия жамғармасининг 1271 ишонч телефонига мурожаат қилишлари мумкин.
