Йиғилиш муҳимми ёки кўрик?
Шу каби саволларимизга жавоб топиш учун 11 январь куни марказда бўлдик.
Соат 10:30 ларда бинога кириб борганимизда марказ ходимлари директор ҳузурида мажлисда эканини айтишди. Зал эса тиббий кўрик учун келган аёллар билан гавжум эди.
– Кеча селектор йиғилиши бўлганди, мажлисда айтилган гапларни ходимларга етказаётган эдим, – деб вазиятга изоҳ берди марказ директори Г.Эшқобилова.
Иш вақтида, шунча одам навбат кутиб турганда, йиғилиш муҳимми ёки кўрик, деган саволимиз эса жавобсиз қолди.
Марказ директорининг айтишича, текширувдан ўтиш учун келаётган ҳар бир аёл электрон рўйхатга олиш тизими орқали навбатга ёзилиб, белгиланган вақтда кўрикка киради. 2016 йилдан буён фойдаланилаётган бу тизим эндиликда онлайн режимига ўтказилиб, туманлардан келаётган ҳомиладор аёлларнинг ўша ерда навбатга ёзилиши, белгиланган вақтда марказга келиши режалаштирилаётган экан. Бу яхши, албатта.
Афсуски, марказда навбат кутаётган аёллар билан суҳбатлашганимизда амалда бу тизим ишламаётганига гувоҳ бўлдик.
– Соат ўнларда келган эдим, – дейди пайариқлик З.Болиева. – Эшик олдидаги ходим қўлимдаги тумандан берилган йўлланмани кўриб, қайси хонага киришим кераклигини айтди. Лекин навбат ҳақида ҳеч қандай қоғоз берилгани йўқ. Қарийб бир соатдан буён навбатимни кутиб турибман.
Ультратовуш текшируви учун навбатда турган ўндан ортиқ ҳомиладор аёлнинг икки нафаридагина навбатга олинганлиги ҳақидаги қоғоз бор экан (Бу ҳам биз одамлардан сўрай бошлаганимиздан сўнг берилгани шундоқ кўриниб турганди). Лекин навбат рақами қайд этилган қоғоздаги ёзувни уни берган ходим тушунмаса, ҳеч бир бемор ўқий олмаслиги аниқ. Чунки инглиз тилида ёзилган экан.
Вилоят марказидан 110 чақирим узоқликдаги Нарпай туманидан келган ҳомиладор аёлларнинг ҳам қўлига навбати ёзилган рақам берилмаган. Улар шу ерда ўтирган кишилардан сўраб, навбатини кутиб турибди.
Кўрикка келганларни қайд этаётган ходим юритаётган дафтардаги ёзувлар ҳам номигагина тўлдирилаётганини англаш қийин эмас.
Савол туғилади – аҳолига қулайлик яратиш, уларнинг ва шифокорларнинг вақтини тежаш мақсадида жорий этилган электрон рўйхатга олиш тизимининг афзаллиги қани? Нега ундан фойдаланилмаяпти? 2016 йилда жорий этилган тизим марказда шу аҳволда ишлаётган бўлса, онлайн тизимдан умид қилса бўладими?
Умуман, бугун давлатимиз томонидан она ва бола саломатлигини асрашда муҳим омил бўлган скрининг марказлари фаолиятини замон талаблари даражасида такомиллаштиришга алоҳида эътибор қаратилаётган бир пайтда жойлардаги муассасалар ҳам ана шу талабга муносиб иш олиб бориши керак эмасми?
Fолиб ҲАСАНОВ,
Алишер ИСРОИЛОВ (фото).
