“Ёшлар овози – 2022”  кўрик-танлови вилоят босқичи бўлиб ўтди

Самарқанд шаҳридаги ёшлар марказида ёшлар ишлари агентлиги вилоят бошқармаси томонидан "Беш ташаббус олимпиадаси" доирасида “Ёшлар овози – 2022” кўрик-танловининг вилоят босқичи ўтказилди. 

Унда туман босқичида ғолиб бўлган 127 нафар  ёшлар иштирок этди.

Танлов 3 ёш тоифасида, тўртта йўналиш – опера,  бахшичилик, анъанавий ижро ҳамда эстрада йўналиши бўйича бўлиб ўтди.

- Опера йўналиши бўйича қатнашяпман, - дейди танлов иштирокчиси Малика Акмалжонова. – Бугун танловнинг республика босқичига йўлланмани қўлга киритдим. Ишонаманки, бу танлов санъатда кўплаб ёш истеъдодларни кашф қилади.

Танловнинг шаффофлигини таъминлаш мақсадида иштирокчиларни баҳолаш учун соҳанинг таниқли мутахассислари ва профессор-ўқитувчилар жалб қилинди. Иштирокчиларнинг барчаси тингланди ва ҳар бир қатнашчи истеъдодига қараб баҳоланди.

Танлов натижасига кўра, 32 та иштирокчи фахрли ўринларни эгаллади. 1-ўринни қўлга киритган 10 нафар истеъдод эгалари Қорақалпоғистон Республикасининг Бўзатов туманида бўлиб ўтадиган республика босқичи йўлланмасига эга бўлди.